Kandidatu Prezidente Repúblika ho númeru sorteiu 02, Francisco Guterres 'Lú Olo', ezerse ona nia direitu votu iha Sentru Votasaun Eskola Ensinu Bázika Númeru 1 Faról Dili, tersa (19/04). Imajen Tatoli/Francisco Sony.

DILI, 19 abríl 2022 (TATOLI) – Kandidatu Prezidente Repúblika períodu 2022-2027, ho númeru sorteiu 2, Francisco Guterres ‘Lú Olo’, hateten sei koopera ho órgaun soberania hotu hodi garante pás no estabilidade iha Timor-Leste.  

“Ha’u sai Prezidente Repúblika ba povu Timor-Leste tomak no ha’u kumpre nia kompromisu tomak hodi bele koopera ho órgaun soberania sira seluk atu garante pás no estabilidade ba dezenvolvimentu ita-nian rain. Ha’u-nian votu signifika pás no estabilidade”, afirma Lú Olo, hafoin ezerse direitu votu iha Eskola Bázika Sentrál (EBS) n.u 1 Farol, Díli.

Kandidatu Prezidente Repúblika ho númeru sorteiu 02, Francisco Guterres ‘Lú Olo’ halo entrevista ho jornalista sira. Imajen Tatoli/Antonio Daciparu.

Kandidatu ne’e garante katak sei manán, “maibé husik rezultadu mak sei determina”.

“Ohin, ha’u mai vota duni hamutuk ho povu Timor-Leste tomak hodi vota ba Prezidente Repúblika ida Timor-Leste nian. Ha’u hanoin demokrasia hanesan ne’e duni. Lakon ka manán laiha buat ida. Povu mak sai juíz. Ohin loron ida ne’e povu mak sei julga mandatu [Xefe Estadu] nia liuhusi votu. Lakon ka manán ho dignidade”, dehan.

Lú Olo promete katak karik la eleitu, sei kontribui nafatin ba Estadu ida ne’e.

“Hanesan sidadaun ha’u sempre kontribui nafatin saida mak ha’u bele atu ita-nian rai ne’e la’o bá oin liuhusi ha’u-nian kompromisu hothotu ne’ebé mak hatete ona ba povu”, akresenta.

Xefe Estadu sei fó prioridade ba estabilidade nasionál liuhusi misaun hanesan Prezidente Repúblika no hakruuk ba Konstituisaun.

Lú Olo husu pavu hotu atu hakat bá sentru votasaun hotu para hili Prezidente Repúblika ida.

Sentru votasaun Faról loke tuku 07.00 dadeer no fó prioridade uluk ba ofisiál eleitorál, brigadista, fiskais, Polísia Nasionál Timor-Leste (PNTL) no órgaun komunikasaun sosiál sira atu vota.

Totál eleitor iha Suku Motael hamutuk 4. 939, fahe ba sentru votasaun haat hanesan EBS n.u 1 Farol, Sede Suku Motael, Sentru Juventude Bebora no armazein Bebora.

Sentru ne’e hetan observasaun husi observadór internasionál, nasionál, fiskais no seguransa husi PNTL.

Jornalista: Isaura Lemos de Deus

Editora: Maria Auxiliadora

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here