Horta manan Lú Olo iha sentru votasaun Masin RAEOA ho votu 1.119. Imajen Tatoli/Abílio Elo Nini

OÉ-CUSSE, 19 abríl 2022 (TATOLI) – Kandidatu Prezidente Repúblika períodu 2022-2027, José Ramos Horta, ho númeru sorteiu 1 manán maioria iha sentru votasaun Eskola Bázika Filiál (EBF) Masin, iha aldeia Sanane, suku Costa sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA).

Iha sentru votasaun ne’e, iha estasaun votu rua, ho rezultadu provizóriu kandidatu númeru sorteiu 1 José Ramos Horta, manan ho votu 1.119 no kandidatu númeru sorteiu 2, Fransisco Guteres ‘Lú Olo’ ho votu 452, hosi totál votu válidu 1.571, votu nulu haat (4) no votu branku lima (5)

“Rezultadu finál apuramentu iha sentru votasaun Eskola Bázika Filiál (EBF) Masin, kandidatu númeru sorteiu 1 mak manán ho votu 1.119, daruak kandidatu Fransisco Guterres ‘Lú Olo’ ho votu 452, ne’ebé ita akompaña nafatin rezultadu finál iha apuramentu munisipál hahú ohin kalan,” Brigadista sentru votasaun EBF Masin, Abelino Mario Lobatu, anunsia rezultadu ba fiskál kandidatu ho votante sira, tersa ne’e.

Purtantu, totál eleitór ne’ebé rejistu iha sentru votasaun EBF Masin hamutuk 1.580 komposta hosi mane 823 no feto 757.

Tuir observasaun Agência Tatoli iha terrenu, apuramente iha sentru votasaun EBF Masin hahú iha tuku 16:00 lokraik remata iha tuku 19:00, ne’ebé hetan seguransa másima hosi PNTL, observa hosi Komisaun Nasionál Eleisaun (CNE, sigla portugés) no akompaña direita hosi fiskál kandidatu na’in-rua.

Nune’e mós iha prosesu votasaun ne’e la’o ho transparánsia tanba brigadista mak responsável ba prosesu tomak, maibé hetan seguransa másima hosi Polísia Nasionál Timor-Leste (PNTL).

Tuir dadus hosi STAE totál eleitór ne’ebé partisipa iha eleisaun prezidensiál 19 abríl 2022, iha RAEOA hamutuk 51.495 komposta hosi mane 26.232 no feto 25.263, ho totál, sentru votasaun 60 no estasaun votu hamutuk 88, ne’ebé envolve brigadista na’in-60 no ofisiál eleitorál na’in-880.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here