Eleitór sira vota iha sentru votasaun paralelu iha Jináziu GMT, Dili, tersa (19/04). Imajen Tatoli/Osória Marques.

DILI, 19 abríl 2022 (TATOLI)—Ema ho Defisiénsia (EhD) matan, Gilberta dos Santos Pereira, husu atu PR eleitu tenke pronunsia ba Governu hodi tau-matan ba ema hotu-hotu ho inkluzivamente iha rai ida-ne’e labele halo diskriminasaun ba ema ida no labele husik ema ida iha kotuk.

Notísia Relevante: Eleitór ne’ebé rejistu iha sentru votasaun paralelu labele vota iha munisípiu

“Ha’u-nian esperansa boot ba Prezidente Repúblika eleitu no sai hanesan Xefe Estadu tenke haree ema ho inkluzivu, sein diskriminasaun no akumula ema hotu-hotu, tantu nia ema ho defisiénsia ka lae, tenke haree hanesan no labele husik ema ida iha kotuk,” Gilberta hateten ba Agência TATOLI, iha Sentru Votasaun Paralelu Jináziu GMT, Dili, tersa ne’e.

Tanba, ema ho defisiénsia no ema lahó defisiénsia ne’e hotu-hotu sidadaun ne’ebé hanesan tanba konstituisaun RDTL artigu 16 (universalidade no igualdade) iha alínea 1 hateten, sidadaun hotu-hotu hanesan iha lei nia oin nomós iha direitu no obrigasaun hanesan.

Iha alínea 2 haktuir, labele halo diskriminasaun ba ema ida tanba nia kulit, nia rasa, nia estadu sivíl, nia seksu, orijen étniku, nia lian, pozisaun sosiál eh ekonómiku, hanoin polítiku ka ideolojia, relijiaun, instrusaun eh nia kondisaun fízika eh mentál.

Nune’e mós, iha konstituisaun artigu 21 (sidadaun ne’ebé iha defisiénsia) iha alínea deha, sidadaun ne’ebé iha defisiénsia fíziku eh mentál iha direitu nomós obrigasaun hanesan sidadaun sira seluk, maibé sira sei la hala’o knar hirak ne’ebé sira labele hala’o tanba de’it sira-nia defisiénsia.

Iha alínea 2 hateten, Estadu wainhira bele, promove protesaun ba sidadaun sira-ne’ebé iha defisiénsia, tuir lei haruka.

Aleinde ne’e, nia husu Prezidente eleitu atu kria template brailler ba Ema ho Defisiénsia (EhD) matan sira, tanba bainhira sira ezerse sira-nia direitu votu iha sentru votasaun ne’e staff voluntáriu mak tulun sira lori ba kabina votu atu hili tuir sira-nia hakarak.

“Iha prosesu vota ne’e ami fó ami-nia lian ba sira mak tuu hela ami-nian tuir ami hateten ba sira atu tuu. Maibé ho kestaun ne’e husu Governu no Estadu ida-ne’e atu kria template brailler ba ami ema ho defisiénsia matan sira, atu nune’e bele ezerse mesak ami-nia direitu votu iha kabina votu ho responsabilidade,” nia dehan.

Prezidente Sentru Votasaun Paralelu Jináziu GMT (gedung matahari terbit), Elias de Deus. Imajen Tatoli/Osória Marques.

Prezidente Sentru Votasaun Paralelu Jináziu GMT (gedung matahari terbit), Elias de Deus, hateten eleitór iha sentru paralelu ne’e iha ona esperiénsia hosi eleisaun prezidensiál primeira volta ne’ebé liu tiha ona ne’e.

“Iha primeira volta ne’e ema barak mak lahatene prosesu vota iha sentru votasaun paralelu sira, nune’e ema mai barak. Maibé agora lae, tanba ita-nia eleitór mós komprende ona tanba esperiénsia iha primeira volta ne’e,” nia informa.

Iha eleisaun segunda volta ne’e, tuir nia, eleitór ne’ebé mak rejistu iha Sentru Votasaun Paralelu Jináziu GMT nian mak tuir vota no sira-ne’ebé mak horibainhira naran laiha ne’e fila ona ba ida-idak nia rai moris fatin hodi tuir votasaun.

“Entaun agora ita haree ema ladún iha no ema mai vota fila kedas. Maibé ha’u hanoin ema komprende ona prosesu rejistu no vota iha sentru ida-ne’e,” nia esplika.

Eleitór ne’ebé rejistu iha Sentru Votasaun Paralelu Jináziu GMT hamutuk 671 no iha sentru ne’e hetan seguransa másimu hosi membru Polísia Nasionál Timor-Leste (PNTL), ne’ebé observa hosi observadór Internasionál no mós iha fiskál kada kandidatura PR na’in-rua ninian.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here