Uma kreda liuhosi Konferénsia Episkopál Timorense (CET) liuhosi Diretór Programa Edukasaun no Sidadania (Programa Educação ba Cidadania), Pe. Domingos Soares Maubere, apela ba sarani no sidadaun sira atu vota ho konsiénsia iha eleisaun segunda volta ne’ebé hala’o iha 19 abríl 2022. Imajen Tatoli/ Cidalia Fátima.

DILI, 18 abríl 2022 (TATOLI)—Uma kreda liuhosi Konferénsia Episkopál Timorense (CET, sigla portugés) apela ba sarani no sidadaun sira iha Timor-Leste no iha diaspora atu vota tuir ida-idak ninia konsiénsia.

Diretór Programa Edukasaun no Sidadania (Programa Educação ba Cidadania), Pe. Domingos Soares Maubere, husu ba eleitór sira atu labele falta hodi ezerse sira-nia direiru votu iha eleisaun prezidensiál segunda volta ne’ebé sei hala’o iha tersa (019 abríl 2022) aban.

“Hosi biban ida-ne’e, ami mai husu ba sarani no sidadaun hotu-hotu tuir lia menon Amo Bispo sira-nian, atu tersa (19/04) aban labele falta ba vota no vota ho konsiénsia, nu’udar direitu no obrigasaun morál iha Maromak, Nasaun ho matebian sira-nia oin,” Pe. Domingos Soares Maubere hateten ba jornalista sira liuhosi konferénsia imprensa ne’ebé hala’o iha Edifísiu Konferénsia Episkopál Timorense, Balide, Dili, segunda ne’e.

Nu’udar ema moris hakarak moris iha hakmatek nia laran tuir Maromak nia hakarak no ba ne’e mak Maromak hakiak ema no tuir dalan ne’ebé Nia hatudu mak mak Maromak haruka nia oan mai, hodi hatudu dalan foun dalan Domin ni’an ba ema hosi Nia oan Mane Jesus Kristu ne’ebé hanorin ema hosi uma kreda.

Igreja mai hanorin ita atu envolve’an iha polítika, hodi hala’o hamutuk moris Nasaun nian iha aspetu hotu-hotu, inklui hili governante sira. Tanba, hotu-hotu iha direitu no dever atu kontribui ho nia votu livre atu promove bem komum ka ema hotu-hotu nia di’ak.

“Ita-nia Nasaun ne’ebé ita tenke hadomi, hanesan grasa boot hosi leten, maibé ita manan mós hosi asswa’in rihun nia raan fakar no ruin naklekar iha Timor laran tomak ne’ebé ita tenke tane nafatin. Ita sei tane nafatin ita-nia éroi sira, bainhira ita kontribui ba Nasaun ninia prosperiedade hosi ita-nia partisipasaaun ativa iha polítika hanesan ba vota iha eleisaun tuir ita-nia Konstituisaun artigu 47 ho artigu 65 hatudu no fó dalan,” Nailulik ne’e hateten.

Tanba ne’e, nia dehan, sidadaun hotu-hotu tenke hein atu CNE ho STAE hala’o sira-nia knar ho kompeténsia, transparénsia no imparsialidade atu hotu-hotu bele partisipa iha eleisaun nu’udar festa demokrasia nian.

Jornalista : Nelia Fernandes

Editór       : Cancio Ximenes   

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here