TDD. Imajen Tatoli /Dok

DILI, 18 abríl 2022 (TATOLI)— Tribunál Distritál Díli (TDD) lihosi desizaun interrogatóriu dahuluk, segunda ne’e (18/4), aplika medida koasaun prizaun preventiva ba arguidu ho inisiál JA, ne’ebé oho nia-feen JDM iha área Manulai Buti, aldeia Peregrinasaun, suku Fatubesi, postu adminsitrativu Hatolia B, munisípiu Ermera.

Tuir akuzasaun hosi Ministériu Públiku (MP), Arguidu JA halo asaun oho nia-feen JDM, iha sábadu (16/4), tuku 12:00, iha área Manulai Buti-Ermera, bainhira vítima JDM toka múzika,maibé arguidu hasee vítima katak vítima nia dansa modelu hanesan nia-aman.

Nune’e, vítima sente lamenta no nervozu hodi tuku ka baku arguidu nia hirus matan dala-rua no hahú haksesuk malu ne’ebé vitima rasik halai sai  husi uma.

Bainhira vítima fila-fali mai uma tuda fatuk hasoru arguidu JA, nune’e arguidu JA halai sai husi uma ka’er katana hodi taa kedas vitima JDM. Hafoin oho tiha vitima arguidu JA sunu tan uma ne’ebé sira hela.

Nune’e, PNTL Eskuadra Hatolia B-Ermera, asegura kedan vítima hodi lori ba halo investigasaun no detein iha sela detensaun komandu munisípiu Ermera hodi kumpre oras 72, molok submete ba julgamentu primeira interrogatóriu.

Ho hahalok arguidu nia ne’e, Ministériu Públiku, imputa arguidu ho krime tolu hanesan  omisídiu agravadu ne’ebe previstu iha artigu 139,  krime inséndiu hosi kódigu penál Timor-Leste no krime arma branka tuir lei númeru 5/2017.

Hataan ba akuzasaun ne’e, arguidu JA deside uza direitu nonook hodi la deklara buat ruma ba Tribunál perante julgamentu.

Ho nune’e, Prokuradór Simão Brites, alega arguido hodi husu ba juís prosesu atu aplika medida koasaun prizaun preventiva.

Entretantu, Defeza arguidu nian, Estaqui Guterres, hateten nia parte konkorda atu juís prosesu uza alegasaun hosi Ministériu Públiku hodi aplika medida koasaun prizaun preventive.

“Ministériu Públiku alega ba ha’u nia kliente no husu tribunál atu haree situsaun arguidu nian, liuliu ba iha nia seguransa no defeza tanba medida koasaun prizaun preventiav ne’e ha’u hanoin adekuada ona,” Defensór ne’e konkorda.

Audénsia julgamentu ne’e, prezide husi Juis singulár Ersilia de Jesus, Ministériu Públiku reprezenta husi Prokuradór Simão Brites, arguidu hetan asisténsia legál hosi Defensoria Públiku Estaqiu Guteres.

Notísia relevante:  Tribunál aplika prizaun preventiva ba arguidu oho nia-feen iha Liquiça

Jornalista: Natalino Costa

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here