Komandante PNTL Munisípiu Baucau, Superintendente António de Sá. Imajen Tatoli/Natalino Belo.

BAUCAU, 18 abríl 2022 (TATOLI) – Komandu Polísia Nasonál Timor-Leste (PNTL) munisípiu Baucau garante seguransa iha eleisaun prezidensiál no sei la tolera individu ne’ebé tenta halo krime iha loron eleisaun 19 abríl.

Komandante PNTL Baucau, Superintendente António de Sá, hateten, autoridade seguransa iha planu no métodu seguransa iha terrenu liga ba eleisaun nian tanba antesipa mosu krime relasiona ho insidente balun ne’ebé akontese iha eleisaun volta dahuluk.

“Ita la tolera ba kualkér aktu ne’ebé akontese iha natureza fragante delitu tanba elisaun ida-ne’e defini estadu nia futuru, husu ita hotu nia kolaborsaun hamutuk, bainhira mosu dezorden públika komunika kedas ba seguransa,” Komandante PNTL Baucau hateten iha Vila Nova, segunda ne’e.

Superintendente António de Sá husu ba brigadista no eleitór sira atu labele fiar boatu ne’ebé espalla iha rede sosiál kona-ba issue kilat ilegál tanba úniku PNTL no F-FDTL mak utiliza arma iha Timor-Leste.

PNTL iha planu klaru atu asegura seguransa durante realizasaun eleisaun prezidensiál volta daruak nune’e sei la fó fatin ba individu ka grupu ruma atu domina nasaun.

“Autoridade seguransa ita garante, sei laiha perturbasaun ka problema ruma tanba ne’e iha volta daruak ne’e ita mantein lei no orden tanba ne’e ita garante sei la akontese buat ruma,” António akresenta.

Nune’e, parte seguransa husu ba brigadista, ofisiál eleitorál no fiskál sira atu kontinua hala’o serbisu tuir lei, liuliu hato’o ba eleitór sira atu nafatin kria pás no estabilidade iha festa demokrasia ho ambiente ne’ebé livre, hakmatek no pasífika.

Komandante PNTL Munisípiu Baucau ne’e husu ba STAE liuhosi birgadista sira atu mantein nafatin liña komunikasaun, koordenasaun no kolaborasaun bainhira mosu tentativa ruma hosi individu ka grupu ruma atu hamosu impedimentu iha sentru votasaun durante realizasaun votasaun.

Parte seguransa nafatin kumpri misaun tuir lei kona-ba distánsia seguransa nian mak metro 25 no responsabliza krime sira iha lei númeru 5/2017 kona-ba arma branka.

PNTL Baucau hetan apoia membru na’in-30 hosi nasionál no sei destaka membru ba kada sentru votasaun hamutuk na’in-rua hodi asegura seguransa durante oras 24 laran to’o mobiliza hikas urnas to’o iha munisípiu hodi kontinua halao apuramentu munisípiu.

Notísia relevante: STAE Baucau distribui urna 300 ba sentru votasaun

Jornalista    : Natalino Belo

Editór           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here