Eleitór sira iha RAEOA hahú hein transporte públiku iha merkadu Tono atu ba sub-rejiaun sira tuir votasaun. Imajen Tatoli/Abílio Elo Nini.

OÉ-CUSSE, 18 abríl 2022 (TATOLI) – Eleitór sira iha Rejiaun Administrativa Espesiál Oé-Cusse Ambeno (RAEOA), hahú dezloka ba sub-rejiaun Oésilo, Pássabe no Nítibe hodi tuir votasaun iha eleisaun prezidensiál volta daruak ne’ebé realiza iha loron-tersa 19 abríl.

Observasaun Agência Tatoli, nota katak iha loron-segunda ne’e eleitór hirak-ne’ebé durante ne’e hela sub-rejiaun Pante Makasar, kapitál RAEOA nian hahú hein karreta iha eis merkadu Tono, suku Cunha, sub-rejiaun Pante Makasar atu ba sub-rejiaun sira hodi tuir votasaun iha idak-idak nia suku no aldeia.

Eleitór sira entusizamu tebes atu partisipa iha eleisaun prezidensiál volta daruak ne’e tanba dadeersan nakukun hein ona movimentasaun transporte públiku iha eis merkadu Tono, tanba hakarak ezerse direitu votu iha festa demokrasia ne’e.

Komunidade RAEOA ne’ebé atu ba sub-rejiaun sira atu tuir votasaun. Iha imajen ne’e komunidade ne’ebé seidauk hetan transporte públiku. Imajen Tatoli/Abílio Elo Nini.

Eleitorál kuaze atus tolu resin hein karreta dezde dadeersan, balun dezloka ona ba sub-rejiaun Oésilo, Pássabe no Nítibe tanba eis merkadu Tono ne’e nu’udar sentru ba movimentasaun transporte públiku no privada sira atu asesu ka ultrapasa ba sub-rejiaun tolu ne’e.

Situasaun oras ne’e iha eis merkadu Tono, eleitór balun hetan ona transporte no balu sei kontinua hein.

“Ha’u ohin halai dala-rua ona, primeiru iha tuku 08:00 dadersan, agora mai atu sa’e fali ba foho tanba pasajeiru barak, mak antrian loos atu ba foho, balu hakarak fila sedu tanba bainbain kuandu lokraik ona sempre udan no mota tún, entaun balu sei la konsege tuir vota,” kondutór angguna, Júlio Neno hateten iha eis merkadu Tono, suku Cunha, Oé-Cusse, segunda ne’e.

Tuir nia, iha dadersan tuku 08:00, iha karreta anguna kuaze 10 ona mak viajen ho pasajeiru nakonu maioria ba sub-rejiaun Oésilo no Pássabe, ba sub-rejiaun Nítibe ladun tanba balun bele liuhosi dalan ponte Noefefan, suku Lifau nian.

Tanba iha sub-rejiaun Oésilo iha suku Tolu, iha sub-rejiaun Pássabe iha suku rua no iha sub-rejiaun Nítibe iha suku lima, ne’ebé komunidade barak mak fila ba sira-nia rai moris fatin atu tuir votasaun iha eleisaun volta daruak aban.

Eleitór Anastasia Kaunan, hatete, razaun sira sub-rejiaun atu tuir votasaun iha tersa 19 abríl, tanba tuir kartaun eleitorál sira rejista iha suku rai moris fatin.

“Durante ne’e ami hela iha sub-rejiaun Pante Makasar mai serbisu iha vila, maibé ami-nia eleitorál halo iha foho, entaun ohin ami tenke ba ona foho atu prepara aban tuir votasaun, tanba votasaun ne’e importante atu hili ita-nia xefe Estadu ba tinan lima nian,” nia katak.

Nune’e, iha eis merkadu Tono, sidadaun ne’ebé aranka sub-rejiaun sira maioria joven feto ho mane, nomoos estudante sira no laiha sidadaun balu dada bandeira kandidatu nian, hodi fila ba knua moris fatin.

Tuir dadus hos STAE totál eleitór ne’ebé sei partisipa iha eleisaun prezidensiál 19 abríl 2022, iha RAEOA hamutuk 51.495 komposta hosi mane 26.232, feto 25.263. iha eleisaun ida-ne’e envolve brigadista na’in-60 no ofisiál eleitorál na’in-880, maibé iha eleisaun volta dahuluk STAE rejista eleitór hamutuk 12.523 mak konsege tuir vota.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here