Administradór postu administrativu Fatumea, Geraldo Orlenas. Imajen Tatoli/Celestina Teles.

COVALIMA, 18 abríl 2022 (TATOLI)—Administradór postu administrativu Fatumea Geraldo Orleans, enkoraja komunidade partisipa no ezerse sira-nia direitu votu hodi hili entre kandidatu Prezidente Republika, José Ramos Horta no Francisco Guterres Lú Olo, sai Xefe Estadu liuhosi eleisaun prezidensiál segundu volta.

Notísia Relevante: STAE Covalima distribui materiál eleisaun prezidensiál ba sentru votasaun 80

“Aban ita hahú ona eleisaun prezidensiál segunda volta. Ba populasaun Covalima, espesiál ba populasaun postu administrativu Fatumea, aban hotu-hotu tenke hakat ba sentru votasaun hodi ezerse direitu votu ho konsiénsia. Maske ema ida la obriga ita maibé nu’udar timor-oan tenke ezerse direitu votu tanba eleisaun ne’e akontese kada tinan lima no vota dala ida,” Administradór Fatumea ne’e hateten ba Agência Tatoli, iha kampu eis eskola pre-sekundária Sandalo, Kampung Baru, segunda ne’e.

Nia hateten, maske iha eleisaun prezidensiál primeira volta ne’e eleitór barak mak la tuir votasaun maibé ba eleisaun prezidensiál segunda volta ne’e, nia parte informa ona ba estudante no funsionáriu Covalima-oan iha Dili, atu bele mai ezerse sira-nia direitu votu iha sira ida-idak ninia rai moris fatin.

Nia garante, iha eleisaun segundu volta ne’e sei iha mundansa no populasaun sira sei ezerse nia direitu votu iha sentru votasaun sira-ne’ebé mak Governu estabelese ona iha kada postu no suku sira iha Covalima.

Tuir dadus, populasaun iha postu administrativu Fatumea hamutuk 2650 no hosi númeru ne’e populasaun ne’ebé la tuir votasaun iha eleisaun prezidensiál primeira volta ne’e hamutuk 500-resin, maibé ba eleisaun segunda volta ne’e sei iha mudansa.

Pároku Igrea Ave Mara Sua, Pe. Sebastião Eugênio da Cruz Correia. Imajen Tatoli/Celestina Teles.

Pároko Igreja Ave Maria Suai, Pe. Sebastião Eugenio da Cruz Correia hateten, tuir ninia observasaun iha eleisaun prezidensiál ba primeira volta ne’e populasaun entuziasmu hodi ezerse sira-nia direitu votu iha sentru votasaun sira.

“Ha’u-nia observasaun populasaun iha Cvalima entuziasmu hodi ezerse sira-nia direitu votu, maibé ita rona eleitór barak mak la tuir votasaun. Nune’e ba eleisaun segunda volta ne’e, ha’u mós fó sai ona avizu iha igreja hodi enkoraja sarani sira katak nu’udar sidadaun ne’ebé di’ak tenke tuir vota,” padre ne’e hateten.

Nia husu ba sidadaun sira atu tuir vota odi ezerse direitu votu ho konsiénsia no domin, nune’e rezultadu votasaun ne’e sei mai ho domin, atu bele kria unidade, fraternidade, pás no estabilidade iha Tmor-Leste.

Entretantu, iha segunda (18/04) ne’e, STAE Covalima distribui ona materiál eleisaun prezidensiál segunda volta ba sentru votasaun 80 no estasaun votasaun 92 iha munisipiu Covalima.

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here