Admistradór Diosezanu Dioseze Baucau, Padre Alípio Pinto Gusmão. Imajen: Agénsia TATOLI/Natalino Belo

BAUCAU, 17 abríl 2022 (TATOLI)– Admistrádor Dioseze Baucau, Padre Alípio Pinto Gusmão husu ba sarani  no Timoroan atu perdua no hakribi malu hodi kontribui ba pás no estabilidade hodi eleisaun prezidensiál segunda volta bele la’o di’ak.

“Ita hein katak hafoin selebrasaun santu páskua ita bele hakribi malu hanesan sarani katólika, maske iha ámbitu plítika ka kampaña eleitorál sai hanesan  adversáriu politika, maibé kontinua hametin pás no estabilidade atu eleisaun bele la’o di’ak, nune’e simu rezultadu hosi eleisaun ne’e rasik tanba hakarak ka lakohi entre kandidatura, nain-ida tenke sai prezidente,” Admistrádor Dioseze Baucau ne’e  hateten ba Agéncia Tatoli iha Igreja Kartedrál Vila-Antiga, domingu ne’e.

Padre ne’e dehan, durante kampaña eleitóral mosu diferensia ideia ne’ebé dalaruma hatun-malu no ko’alia aat malu. Tanba ne’e ho selebrasaun Santa Páskua momentu atu transforma hahalok sira hanesan buka simu malu, mezmu atake malu durante kampaña eleitóral.

Tanba, Prezidente Repúblika nu’udar orgaun soberania dahuluk iha Timor-Leste presiza iha lideransa ne’ebé kapasidade tanba eleitór sira iha autoridade no kapasidade matenek atu hili entre kandidatura Prezidente Repúblika nain-rua iha tempu eleisaun.

Amu afirma sarani sira tenke haka’as aan moris iha sentidu paskua ho loloos, presiza halo transformasaun hosi atetude,komportamentu sira ne’ebé durante ne’e moris iha pesimista, laiha esperansa, iha sala nia-laran no problema no konflitu tenke transforma sai diak.

Reflesaun seluk, transformasaun vida moris foun hanesan muda hahalok, liuliu tau konfiansa ba autoridade iha uma kreda no ikus mak hametin fé katak ho fiar Jesus moris hias tenke tau neon no esperansa bo’ot liután iha lalehan.

“Paskua mak transformasaun vida, ita tama ba kriasaun foun loron uluk semana nian, buat hotu-hotu tenki hafoun vida,” Padre Alípio akresenta.

Padre Alípio konsidera Prezidente Repúblika eleitu iha póder ukun tuir Konstitusaun Repúblika Demokrátika Timor-Leste (KRDTL) ne’ebé fó autoridade ka kbi’it tomak atu ukun nune’e bainhira eleitu hotu-hotu tenke respeitu.

“Tenke sai prezidente ba ema hotu, atu mai hosi grupu ka partidu ne’ebé de’it, kuandu eleitu ona hotu-hotu tenke buka atu submete ba,” Padre Alípio akresnta.

Eis Padre Pároku Manatuto ne’e, husu Baucau-oan atu evita konflitu no hado’ok aan hosi provokasaun nune’e kria pás no estabilidade iha ámbitu hakmatek atu ema hotu ezerse direitu votu tuir konstitusaun haruka.

Iha fatin ketak, Padre Luis Goveia, husu ba sidadaun sira atu ezerse nia-direitu votu tuir konsiénsia iha eleisaun prezidensiál segunda volta, ne’ebé sei realiza iha loron 19 fulan abril  tinan 2022.

“Ita vota tuir ita-nia konsiénsia no vota labele haree tuir sasan ne’ebé oferese, ha’u vota ba nia, mak ne’e ona, ne’e sala mortál, tanba kontra ita-nia konsiénsia ne’ebé  maromak ko’alia ona,” Padre Luis hato’o lia-hirak  ne’e , hafoin prezide misa domingu Resuresaun, iha Igreja Ave Maria Suai.

Nu’udar sidadaun labele baruk atu ezerse nia direitu votu iha sentru votasaun ne’ebé governu estabelese ona tanba votu ida vale ba tinan lima (5)  hodi halo muda situasaun.

“Sidadaun  hotu- hotu ba vota no labele baruk atu ba vota,votu ida bele muda situasaun no vota tuir konsiénsia labele haree ba sasan, ne’e ita sala atensaun”nia apelo

Bazea ba oráriu ne’ebé Komisaun Nasionál Eleisaun (CNE-Sigla Portugués) fó sai katak, eleisaun segunda volta realiza iha loron 19 abríl 2022.

Jornalista  : Natalino Belo/ Celestina Teles

Editór         : Florencio Miranda  Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here