Komandante Jerál Polisia Nasionál Timor-Leste (PNTL), Komisáriu Faustino da Costa, hala’o pasa revista ba formatura membru PNTL sira ne’ebé atu dezloka ba munisípiu sira asegura eleisaun Prezidensiál segunda volta. Imajen/Natalino Costa.

DILI, 17 abríl 2022 (TATOLI)— Komandu Polisia Nasionál Timor-Leste (PNTL), domingu ne’e, dezloka ona membru nain-154 ba munisípiu sira atu fó apoia seguransa ba eleisaun prezidensiál segunda volta ne’ebé realiza iha loron 19 abríl ne’e.

Biban ne’e, Komandante Jerál PNTL, Komisáriu Faustino da Costa, hateten membru efetivu hirak ne’e dezloka ba munisípiu sira hodi fó apoia rekursu ba Komandu Munisípiu sira hodi asegura seguransa ba sentru votasaun sira iha territóiu nasionál.

“Ita hamutuk iha fatin ida ne’e, atu dezloka membru hirak ne’e bá munisípiu atu responde ba atividade seguransa eleisaun prezidensiál períodu 2022 too 2027 ho bazea ba ezijensia hosi Komandu Munisípiu no Autoridade Munisípiu sira,” Komisáriu Faustino da Costa, hateten liuhosi intervesaun iha seremónia  formatura jerál  ba destakamentu membru PNTL nain-145 ba Komandu  Munisipiu sira, ne’ebé mak hala’o  iha Kuartél Jerál PNTL Caicoli.

Notísia relevante:PNTL husu públiku labele fiar informasaun kilat ilegál espalla iha territóriu

Nune’e, Komandu PNTL nafatin husu ba membru sira atu hatudu imparsialidade, neutralidade, labele afavór ba iha rás, grupu no etniku ka relijiaun ruma, maibé hatudu profisionalizmu nafatin bainhira halo servisu perante misaun PNTL nian tuir konstitusaun RDTL haruka.

Komandante Jerál mne’e mós kongratula ba membru PNTL sira hotu, ne’ebé hatudu servisu di’ak perante kampaña no eleisaun prezidensiál iha primeira volta tanba buat hotu bele la’o di’ak.

“Ha’u husu ba membru sira kontinua hatudu profionalizmu, rona no simu orientasaun   hosi Komandu PNTL Munisípiu sira ne’ebé mak destaka ba, nune’e bele fó susesu ba ita nian eleisaun prezidensial  segunda volta bele lao di’ak liután,”  Komsiáriu PNTL ne’e apela.

Iha biban hanesan, Komandante Unidade Patrullamentu Fronteira (UPF), Superintendente Euclides Belo, hateten UPF hatun efetivu 100-resin hodi apoia seguransa iha liña fronteira durante eleisaun Prezidensiál.

“Ami dezloka membru efetivu 100-resin hodi  apoia Komandu Munisípiu tolu hanesan Bobonaro, Covalima no Rejiaun Administrativu Espesiál Oé-Cusse no Ambeno (RAEOA),” nia afirma.

Hahú ohin, UPF koloka ona membru nain 100-resin atu apoia ba Komandu Munisípiu tolu ne’e atu hala’o vijilánsia makas asegura iha fronteira terrestre no sentru votasaun sira ne’ebé besik nasaun viziñu.

Durante ne’e, kampaña ba eleisaun prezidensiál segunda volta situasaun jerál iha fronteira terrestre la’o hakmatek.

“Iha loron 16 abríl, dader,  mak membru UPF sira detein sidadaun Indonézia nian-ida tanba halo atividade transasaun ilegál hanesan faan sosis tama liu mai iha área fronteira Timor-Leste, ita detein duni hafoin ita informa ba iha Servisu Migrasaun ita nian no deporta kedan sidadaun ne’e ba fali nia rai,” nia afirma.

Membru na’in-145 ne’ebé dezloka ba munisípiu sira mai hosi unidade iha Komandu Jerál PNTL hanensa membru sira iha Sentru Formasaun Polisia (sigla portuges CFP), Unidade Espesiál Polisia (UEP), Unidade Polísia Marítima (UPM), Unidade Patrollamentu Fronteira (UPF) no Servisu Migrasaun (SM).

Notísia relevante: PNTL preparadu asegura kampaña no eleisaun prezidensiál segunda volta

Jornalista: Natalino Costa

Editór: Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here