Eis Kandidatu Prezidente Repúblika volta dahuluk períodu 2022-2027, Lere Anan Timur ho ekipa susesu hala'o komferénsia imprensa, iha sede nasionál Lere Anan Timur Praia dos Coqueiros, Dili, sábadu (16/04). Imajen Tatoli/Francisco Sony.

DILI, 16 abríl 2022 (TATOLI) – Tenente Jenerál Reformadu, Tito da Costa Cristovão  ‘Lere Anan Timur, apela ba militante no apoiante sira atu idak-idak vota ho konsiénsia iha eleisaun prezidensiál volta daruak ne’ebé sei realiza iha loron 19 abríl 2022.

“Pozisaun hanesan antes ne’e ha’u dehan ona, ha’u-nia militante no apoiante uluk apoiu iha primeiru ronde mai hosi partidu oinoin, grupu arte-marsiál, atu idak-idak fila ba nia partidu no vota tuir konsiénsia iha eleisaun segundu volta,” Kandidatu Prezidente Repúblika ne’ebé kompete iha volta dahuluk ne’e informa liuhosi konferénsia imprensa iha sede Praia dos Coqueiros, Dili, sábadu ne’e. 

Jenerál Reformadu ne’e dehan nia dilema iha situasaun polítika atuál iha eleisaun volta daruak atu apoiu loos kandidatu se.

“Iha segundu ronde haree hosi sorin-sorin iha Taur no Xanana, ha’u mezmu hanesan ema FRETILIN maibé dilema iha situasaun apoiu ida mós labele, nune’e sé iha momentu votasaun ha’u fó votu ba nasaun,” nia hateten.

Maske nune’e, Lere husu ba kandidatu Prezidente Repúblika ne’ebé bainhira eleitu atu sai Xefe Estadu ba povu tomak hodi hala’o kna’ar buka rezolve problema nasaun hanesan impase polítiku no kria pás no unidade.

“Ita-nia independénsia tinan barak ona tanba de’it mosu impase polítiku halo la ba oin nune’e apela ba Prezidente Repúblika eleitu no ministru balun ukun rai ho responsabilidade, sentidu Estadu la’ós hanoin de’it kadeira no osan ne’ebé prezudika ba nasaun,” nia apela.

Tenente Jenerál Reformadu ne’e simu rezultadu eleisaun iha volta dahuluk tanba demokrasia.

Veteranu tinan 24 ne’e  akompaña situasaun polítiku iha rai laran hakmatek iha períodu kampaña volta daruak la’o di’ak maske liafuan balun la maduru fó-sai hosi kandidatu na’in-rua tanba maibé tanba demokrásia.

Jornalista   : Nelson de Sousa
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here