Jesus nia Krús iha Igreja Balide. Imajen/Espesiál

DILI, 15 abril 2022 (TATOLI)—Padre Pároku Imakulada Conceição Balide, Graciano Barros, konsidera selebrasaun tridun paskál iha sesta-feira santa, lori sarani ho hanoin krús la’ós fatin kastigu, torturasaun, violénsia no fatin kondenasaun.

“Bainhira ita ema kristaun ne’ebé fiar Na’i Maromak, sei haree sentidu hosi krús nu’udar sinál salvasaun no espresaun Jesus nia domin ba umanidade. Nia mate iha Krús tanba atu manán ita hosi sala no atu lori filafali ita ba Na’i Maromak,” Amu Graciano Barros, hateten, ba sarani sira iha ninia omília iha misa sesta-feira santa, iha Igreja Balide.

Notísia relevante: Dom Virgílio: Mundu ohin loron susar atu serbí malu

Nia dehan, iha selebrasaun ne’e, Jesus hakarak hatudu ninia domin ba ema hotu iha mundu hodi mate iha krús.

Tuir Amu selebrante ne’e, laiha domin ida mak boot liu buat ne’ebé Jesus halo ba mundu hodi fó nia vida tomak atu manán mundu hosi sala no lori ema filafali ba Maromak, tanba krús hatudu ba mundu iha vertikál no horizontál, Jesus hela iha krús nia klaran atu hatutan relasaun entre ema ho Maromak no ema ho ema.

“Ita kuandu hanoin hikas filafali krús ne’e iha ai-rua, ida tau tesik no ida tau loos (vertikál no horizontál), iha ai-rua ne’e hatúr iha ne’ebá Jesus nia isin, sinál vertikál hatudu relasaun ema ho Maromak no sinál horizontál ne’e atu hametin relasaun ita ho maun alin sira. Tanba ne’e, Jesus hamriik iha klaran  atu hatutan relasaun ba buat rua ne’e,” nia esplika.

Jesus sempre obdese nafatin ba Aman Maromak nia hakaran, hanesan Jesus nia liafuan ikus molok hakotu iis iha krús leten: “Ha’u Aman, ba Ita liman Ha’u saran Ha’u-nia klamar.”

Ba Amu selebrante, hahalok ne’e atu fó hanoin ba sarani kristaun iha mundu, espesiál iha Parokianu Balide, bainhira hasoru situasaun difisil, bainhira fiar Aman-Maromak, maski todan oinsá, buat hotu bele rezolve.

“Ohin loron sarani barak mak la fiar-an, barak mak halai dook hosi Jesus hodi lakohi lori sira-nia krús la’o tuir Jesus, maibé Jesus ema ida iha domin boot ba umanidade, nia sempre fó tempu ba ema hotu ne’ebé hakarak filafali ba nia,” Padre Graciano dehan.

Nune’e, molok selebrasaun Jesus nia mate-isin iha Parókia Balide ne’e remata, Amu selebrante, Na’i-lulik hamutuk ho Madre no sarani sira lori Jesus nia mate-isin halo prosesaun la’o tuir área Igreja Balide, hafoin lori filafali haloot iha kampa ne’ebé prepara ona.

 Jornalista : Tomé Amado

Editora       : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here