Administrór postu administrativu Ossu, munisípiu Viqueque, Sebastião Pereira Pires. Imajen TATOLI/Vitorino Lopes da Costa.

VIQUEQUE, 15 abril 2022 (TATOLI)—Administadór postu Ossu, Sebastião Pereira Pires, informa, daudaun ne’e empreza responsável sira hahú ona implementa projetu eletrifikasaun iha postu administrativu Ossu, munisípiu Viqueque.

“Foin lalais ha’u halo ona enkontru ho Xefe tékniku Eletrisidade de Timor-Leste, Empreza Públika  (EDTL, E.P) kona-ba dada elestridade ba suku. Postu Ossu iha suku lima maka seidauk asesu ba eletrisidade, maibé agora hahú implementa ona iha suku tolu,” Administradór hateten ba Agência TATOLI, iha postu Ossu, sesta ne’e.

Notísia relevante: EDTL, E.P selebra kontratu ho empreza manan-na’in 17 projetu eletrifikasaun nasionál

Empreza tolu maka responsável ba projetu eletrifikasaun iha suku tolu hanesan Sae Isi Unip, Lda, Uaikana Unipesoal, Lda,  no Indru Unip, Lda.

Suku Nahareka no Lariku maka seidauk  hetan eletrisidade no suku Uabubu, Uaibobo no Osorua hahú implementa ona projetu eletrifikasaun, nune’e tempu badak populasaun sei asesu eletrisidade.

“Ha’u sente kontente tebes ba VIII Governu tanba  bele responde ona preokupasaun populasaun kona-ba eletrisidade. Ha’u nafatin husu Governu hodi tau-matan ba populasaun ne’ebé seidauk asesu eletrisidade,” nia akresenta.

Nune’e, Autoridade postu ne’e husu empreza atu aselera serbisu maibé ho kualidade tanba durasaun implementa projetu ba fulan-neen, hahú serbisu loron 21 fevereiru no ramata 21 jullu 2022.

“Tenki aselera atu ita-nia povu bele asesu eletrisidade, nune’e populasaun sira bele sente independénsia,” nia tenik.

Joranlista : Vitorino Lopes da Costa

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here