Administrór postu administrativu Ossu, munisípiu Viqueque, Sebastião Pereira Pires. Imajen TATOLI/Vitorino Lopes da Costa.

VIQUEQUE, 15  abril 2022 (TATOLI)--Administrór postu Ossu, munisípiu Viqueque, Sebastião Pereira Pires, husu komunidade partisipa iha eleisaun prezidensiál segundu volta iha loron 19 abril.

“Iha eleisaun primeira volta, barak maka la partisipa. Tanba ne’e ha’u husu populasuan ne’ebé iha ona kartaun eleitóral atu partisipa másimu ba eleisaun segunda volta hodi hili ita-nia Prezidente Repúblika ba períodu 2022-2027,” Administradór hateten ba Agência TATOLI, iha postu Ossu, sesta ne’e.

Notísia relevante: STAE Viqueque hahú verifika no halo pakotementu materiál Eleisaun Prezidensiál

Autoridade ne’e fó ona orientasaun ba Xefe suku no Brigada sira hodi fó hatene ba komunidade sira partisipa eleisaun ho di’ak.

“Hili Kandidatu Prezidente Repúblika tuir ida-idak ninia konsiénsia. Ita hakarak demokrasia iha Timor-Leste sai buras maibé taxa partisipasaun maka tenki másimu,” nia akresenta.

Nune’e ba Kandidatu Prezidente Repúblika sé de’it mak eleitu, Autoridade postu husu ba kolabora di’ak ho Governu hodi tau-atensaun ba estrada, bee-moos no eletrsidade ba povu.

“Presiza mós fó prioridade ba populasaun halo to’os no natar hodi sustenta família. Tantu kandidatu Francisco Guterres Lú Olo no José Ramos Horta, ida ne’ebé maka sai Prezidente Repúblika, povu Ossu ninia preokupasaun maka oinsá povu bele moris di’ak. Povu moris di’ak, oan sira tenke asesu ba edukasaun,” nia hameno.

Tuir dadus, númeru eleitór Eleisaun Prezidensiál 2022 iha munisípiu Viqueque hamutuk 58.421, kompostu hosi mane 29.675 (51%) no feto 28.746 (49%), partisipa eleisaun 43.252 (74,73%).

Iha eleisaun primeira volta iha loron 19 marsu iha munisípiu Viqueque, eleitór ne’ebé la partisipa eleisaun hamutuk 14.629, nune’e CNE esforsu hodi fahe informasaun liuhosi meiu komunikasaun hodi sidadaun sira  ne’ebé la partisipa eleisaun primeira volta bele partisipa fali.

Joranlista : Vitorino Lopes da Costa

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here