Ekipa tékniku no brigadista Sekretariadu Tékniku Administrasaun Eleitorál (STAE) munisípiu Bobonaro hahu prosesu verifikasaun buletin votu. Imajen Tatoli/Sérgio da Cruz.

BOBONARO, 14 abríl 2022 (TATOLI) – Brigadista na’in-150 hamutuk ho ekipa Sekretariadu Tékniku Administrasaun Eleitorál (STAE) Munisípiu Bobonaro, kinta ne’e hahú ona halo prosesu verifikasaun ba buletin votu.

Diretór Munisípiu STAE Bobonaro, Mariano Viegas Amaral, esplika, prosesu verifikasaun ne’e hahú kinta 14 to’o 17 fulan-marsu, hetan seguransa hosi PNTL, superviziona hosi Komisaun Nasionál Eleisaun (CNE, sigla portugés) akompaña direita hosi Provedoria Direitu Humanu no Justisa (PDHJ) no responsável kandidatu na’in-rua iha munisípiu ne’e.

“Tuir lista ne’e simu hosi nasionál hanesan buletin votu totál livru iha laran hamutuk 1,586, no folla 79,300, tanba ne’e ohin ita halo verifikasaun atu haree keta iha buletin votu balun nakles ka ku’ak ruma no tinta kona, ita koordena malu tau kedas karimbu la uza,” nia ko’alia iha salaun STAE Bobonaro.

Nia husu ba observadór nasionál, internasionál sira no ofisiál eleitorál sira atu akompaña prosesu ne’e to’o remata molok halo pakotementu ba materiál sensitivu no la’ós-sensitivu sira.

“Ita agora iha semana Santa depois ita sei deside hamutuk, maibe ita iha tempu loron tolu ka haat de’it, tanba ne’e ita hosi tempu balu bele ba misa no viasakra depois misa remata mai fila fali atu ita bele aselera prosesu ne’e,” nia katak.

Nia fó-sai katak, materiál sensitivu no la’ós-sentivu ho pakote, transporta hosi nasionál to’o iha munisípiu Bobonaro iha loron kuarta ne’e, kompostu hosi materiál senstivu totál no kuantidade mak hanesan; urna hamutuk 247, kabina votu kuantidade 100, selus kuantidade 4,200 tinta indelivél 600.

Nune’e mós autokolante kódigu 630, lista votante, akta rezultadu sentru votasaun 390, akta operasaun sentru votasaun no estasaun  votasaun 300, lista adisionál 150, lista funsionáriu 150, lista ofisiál votasaun 150, lista fiskál 150, lista observadór 150, formuláriu termu entrega materiál 150, livru formuláriu reklamasaun 150 no deklarasaun segredu 150.

Folla avizu 150, kódigu estasaun votu 130, envelope akta operasionál 130, envelope la uza 150, envelope kanseladu 150, envelope abandonadu 150, lista prezensa profisionál komunikasaun social no vota 150, poster prosesu iha estasaun votasaun 150, ezemplu buletin votu 130, poste proividu 150, kartaun ID ofisiál eleitorál 150, lista adisionál rezerva 150, lista PNTL/F-FDTL 150 no formulariu termu entrega 130.

Termu entrega akta rezultadu 130, kódigu sentru votasaun 130, envelope akta operasionál 130, envelope nulu 130, envelope branku 130, envelope rejeitadu 130, envelope reklamadu 130, envelope votu válidu kada kandidatu 260, poster prosesu kontajen 130, lista prezensa fiskál apuramentu munisípál ida, lista prezensa observador no monitorizadór iha apuramentu munisipál ida no karimbu eleisaun prezidente rua.

Totál eleitór ne’ebé idade elijivel sei partisipa iha eleisaun prezidensiál 19 abríl  2022 iha Bobonaro hamutuk 70,283, ho totál sentru votasaun 130 no estasaun votasaun 150, ne’ebé sei envolve brigadista na’in-150 no ofisiál eleitorál na’in-1,500.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here