Diretór STAE Baucau, Lúcio Freitas Salvador. Imajen Tatoli/Natalino Belo.

BAUCAU, 14 abríl 2022 (TATOLI) – Sekretariadu Tékniku Administrasaun Eleitorál (STAE) Munisípiu Baucau, husu ba eleitór sira atu vota ho loloos iha eleisaun prezidensiál 19 abríl nune’e evita votu nulu tanba munisípiu Baucau mak rejista votu nulu aas-liu iha volta dahuluk.

Diretór STAE Munisípiu Baucau, Lúcio Freitas Salvador, hakfodak tanba foin dahuluk rejista votu nulu barak liu iha Timor-Leste mak munisípiu Baucau iha eleisaun prezidensiál períodu 2022-2027 iha volta dahuluk.

“Husu ba eleitór sira vota ho konsiénsia no vota ho loloos tanba hein durante loron tomak maibé rezultadu votu nulu ne’e oinsá, vota dala ida-ne’e determina ba tinan-lima tanba ne’e tenke iha konsiénsia atu deside, vota ho loos atu votu válidu nune’e determina ita-nia futuru,” Diretór STAE Baucau hateten iha Vila Nova, kinta ne’e.

STAE sempre tún direita ba baze liuhosi programa edukasaun votante hanesan parte estratéjia minimiza votu nulu iha Baucau maibé realidade eleitór sira nafatin determina direitu votu ne’ebé rezulta votu nulu sa’e iha Baucau.

Lúcio esplika, antes realiza eleisaun prezidensiál realiza STAE programa edukasaun votante liuhosi ofisiál edukasaun votante inklui brigadista iha kada suku sira iha postu administrativu neen maibé votante barak mak la fó importánsia ba programa refere tanba razaun hatene ona.

Hafoin rezultadu eleisaun volta dahuluk, STAE nafatin kontinua ho programa refere liuhosi kada postu reprezenta suku neen no brigadista hala’o programa refere iha suku seluk iha kada postu administrativu.

Matéria importante iha programa refere mak hanesan bainhira mak vota mak loron votasaun, vota iha-ne’ebé mak ezerse direitu iha sentru votasaun no vota oinsá mak tenke marka uza lapizeira ka tú uza pregu ka sinál dala-ida ba kandidatura sira.

“Balun dehan STAE nia preparasaun ladi’ak, laiha kapasidade, ita dún malu de’it maibé realidade iha baze eleitór sira la fó importante ba edukasaun votante,” Lúcio akresenta.

Lúcio argumenta atu minimiza votu nulu depende ba konsiénsia hosi eleitór sira tanba hosi rezultadu eleisaun buletin votu barak konsideradu nulu ho indísiu iha intensaun hakarak vota nulu hanesan hakerek, tú hotu kandidatura sira no asinatura iha buletin votu.

Tuir dadus, rezultadu eleisaun prezidensiál volta dahuluk taxa partisipasaun iha Baucau 74,35% hosi eleitór hamutuk 71.137 hosi totál eleitór rejistadu 96.207, kompostu votu nulu na’in-2.035 (2,86%), reklamasaun 93 (0,13%), rezeitadu 4 (0,01%), abandonadu 17 (0,02%), branku 595 (0,84%) no votu válidu hamutuk 68.393 (96,14%).

Jornalista   : Natalino Belo

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here