Diretór Ezekutivu SERVE, Florêncio Sanches. Imajen TATOLI/Jogerjo Guterres

DILI, 14 abril 2022 (TATOLI)—Servisu Rejistu no Verifiksaun Emprezariál, Institutu Públiku (SERVE, I.P) ezekuta ona Orsamentu Jerál Estadu (OJE) 2022 ho montante $1.037.937,39 (34,9%) iha trimestre dahuluk (janeiru to’o marsu) hosi totál alokasaun $2.537.259.

“Ezekusaun kompostu hosi kompromisu $152.620,52, obrigasaun $572.940,48, atuál $312.376,39, nune’e saldo $1.499.321,61,” Diretór Ezekutivu SERVE, I.P, Florêncio Sanches, informa ba Agência TATOLI, iha ninia knaar fatin, Hudi-laran, kinta ne’e.

Notísia relevante: SERVE rejista empreza foun 4.200 iha tinan 2021

Orsamentu tinan 2022 ba SERVE, I.P aloka ba bens no servisu $2.537.259, saláriu vensimentu laiha, kapitál menór laiha, kapitál dezenvolvimentu laiha no transferénsia públika laiha.

“Tinan ne’e ita husu orsamentu ba renovasaun estabelesimentu sukursál SERVE, I.P nian iha munisípiu hotu, entaun hetan osan hamutuk $100.000 iha tinan ne’e, nune’e kada munisípiu hetan $10.000 atu hadi’a edifísiu sira hanesan, janela ruma a’at karik atu hadi’a,” Diretór Ezekutivu relata.

Hosi totál alokasaun orsamentu tinan tomak ba instituisaun ne’e, fahe ba trimestre dahuluk ho montante $634.314,75 (25%), ezekuta ona $236.516,88, nune’e saldo ne’ebé falta $397.797,87.

Iha aspeitu jerál, saldo atuál SERVE, I.P rejistadu to’o loron 31 marsu 2022 ho montante $2.300.742,12.

SERVE iha programa rua hanesan boa-governasaun no jestaun instituisionál ho investimentu no diversifikasaun ekonomia, sub-programa rua no atividade rua.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here