Sekretáriu Estadu Juventude no Desportu, Abrão Saldanha. Imajen TATOLI/Francisco Sony

DILI, 14 abril 2022 (TATOLI)—Sekretaria Estadu Juventude no Desportu (SEJD), iha tinan 2021, ajuda organizasaun juventude hamutuk 22 inklui sentru juventude sira hodi forma foin-sa’e inklui realiza tan formasaun ba joven iha área oin-oin.

“Ita konsege lori informasaun ba joven sira iha munisípiu no formasaun kona-ba edukasaun sívika, life skill basic education, inklui ajuda joven sira iha kompeténsia atu iha mehi ba futuru. Iha tempu pandemia COVID-19 ajuda sira fahe informasaun sobre prevensaun,” Sekretáriu Estadu Juventude no Desportu, Abrão Saldanha, informa liuhosi programa ‘Meet the Press’, ne’ebé realiza hosi Sekretaria Estadu Komunikasaun Sosiál (SEKOMS), hodi relata atinjimentu VIII Governu Konstitusionál, iha salaun Prezidénsia Konsellu Ministru (PCM, sigla portugés), Palásiu Governu, kinta ne’e.

Notísia relevante: SEJD ensera formasaun hospitalidade ba joven 40

Iha área juventude iha 2021, realiza festival jovens criadores, ne’ebé permite esplora joven nia potensialidade no fó espasu atu hatudu poténsia. Programa ne’e realiza iha Ainaro, Liquiçá no Baucau, ho partisipante 200 resin ne’ebé mak iha kreatividade oioin, nune’e bele kontribui ba ekonomia rai-laran.

Sekretáriu Estadu hateten, hafoin simu mandatu hanesan membru Governu atu lori vizaun ba juventude, iha kedan hanoin hodi foin-sa’e mileniál iha forsa, kreatividade no rekoñese foin-sa’e sira-nia potensialidade hanesan forsa atu kria solusaun ba problema iha rai-laran.

“Ita hatene situasaun demografika, ita iha idade menus hosi 35 pur volta 75% hosi populasaun ein jerál, ne’ebé hatudu juventude iha forsa boot atubele muda situasaun iha ita-nia rain. Hosi vizaun ne’e mak dezenvolve programa oioin iha área juventude, ne’ebé atividade dahuluk mak espansaun sentru juventude sira, hafoin halo avaliasaun ida ba sentru juventude 14 iha territóriu tomak nune’e hakarak espande,” nia otimista.

Enkuantu, iha ámbitu rekuperasaun ekonómika, ho esforsu atu harii ekonomia rejiliénte, SEJD introdús programa ida ho naran ‘estimulu empreendedorismu sosiál ba joven sira iha suku’, atu dudu foin-sa’e sira iha suku bele iha hanoin ba oportunidade vida la’ós de’it iha eskritóriu sira maibé iha kampu sira.

Nune’e, hosi programa ne’e konsege apoiu grupu kreativu 358 iha área peska, agrikultura, pekuaria, turizmu no kuidadu ambientál, ne’ebé grupu kreativu sira iha suku 282 benefisia ona joven 500 resin ho diretamente asesu ba fundu.

Iha formasaun forma joven sira, prepara joven sai líder ka kuadru ba futuru, liuhosi programa formasaun joven ‘Parlamentu Foin-sa’e’, ne’ebé tinan 2021 prepara joven 130, iha kada postu administrativu iha reprezentante na’in-rua.

“Governu mós hanoin papel importante ida reprezentante joven iha suku inklui prepara joven dinamiza no organiza di’ak liután atividade iha suku, tanba ne’e iha tinan 2021 fó formasaun ba joven hodi hatene halo planu no dinamiza di’ak liután atividade juventude, nune’e bele kanaliza di’ak liu informasaun hosi baze mai sentrál no sentrál ba baze, nune’e forma ona joven hamutuk 500 resin,” Sekretáriu Estadu tenik.

Iha área formasaun, SEJD organiza ona formasaun ba treinadór báziku ba eskutizmu, tanba valór eskutizmu ne’e importante, nune’e fó formasaun no espasu ba joven sira besik 1.000 ba voluntarizmu liuhosi Cruz Vermelha Timor-Leste (CVTL, sigla portugés).

Fahe mós informasaun no teknolijia, ka bolu joven sira utiliza internet ho saudável iha munisípiu hotu, inklui fahe mós informasaun kona-ba teknolojia ka mantensaun komputadór sira no dezeña web site.

Atinjimentu seluk, SEJD forma ona treinadór ba relasaun saudável liuhosi disemina informasaun, hamutuk ho ema na’in-36 tanba tinan kotuk konsege lansa manuál ida ba relasaun saudável atubele mitiga risku isin-rua sedu no kaben sedu hosi joven sira.

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here