Vendedór sira fa’an produtu agíkola iha merkadu Manleuana, kuarta (21/07). Imajen TATOLI/António Gonçalves

DILI, 14 abril 2022 (TATOLI)—Banku Dezenvolvimentu Aziátiku (ADB, sigla Inglés), iha semana kotuk, lansa relatóriu ikus Asian Development Outlook 2022, ne’ebé hatudu katak Timor-Leste nia kresimentu Produtu Internu Brutu (PIB) sa’e pozitivu 1,8% iha tinan 2021.

“Kresimentu pozitivu akontese iha tinan 2021 tamba konsumu públiku sa’e maka’as ho promulgasaun Orsamentu Jerál Estadu (OJE) 2021. Iha fulan-abril, OJE 2021 hetan aumentu signifikativu nune’e totál despeza sa’e to’o besik biliaun $2. OJE Retifikativu 2021 rezulta hosi enjeñaria finanseira ida, ne’ebé Governu halo hodi la presiza foti tan osan adisionál hosi Fundu Petrolíferu,” refere nota hosi Ministériu Finansa (MF) ne’ebé Agência TATOLI asesu, kinta ne’e.

Previzaun ADB nian, a’as liu dadus provizóriu ne’ebé fó-sai hosi Diresaun Jerál Estatístika MF ne’ebé lansa iha fulan kotuk, hatudu pozitivu 1,5% iha tinan 2021 hosi negativu 8,6% iha tinan 2020.

Notísia relevante: PIB la’ós petrolíferu tinan 2021 sa’e ba 1,5%

Maski kresimentu PIB kiik, maibé iha aumentu hafoin Timor-Leste nia ekonomia tama iha resesaun iha tinan 2020, ho kresimentu negativu 8,6%, ne’ebé kontrasaun iha PIB tamba Estadu funsiona de’it ho rejime duodesimál to’o inísiu trimestre dahaat. Situasaun ne’e halo PIB Timor-Leste kuaze hanesan ho tinan-hitu liubá (tinan 2013).

Enkuantu, kompara ho OJE 2020, OJE Retifikativu 2021 iha aumentu liu 30%, tanba momentu ne’ebá Governu hahú aplika medida ekonómika sosiál iha ámbitu prevene no kombate COVID-19 no iha tempu hanesan bele hakma’an situasaun sosiál no ekonomia empreza, traballadór no família, inklui buka atu rekupera ekonomia no atu hadi’a infraestrutura sira ne’ebé hetan estragu tamba konsekuénsia hosi Siklone Seroja.

“Orsamentu Jerál Estadu ida ho montante boot, maka konsumu públiku sa’e ba 6,2%, liuliu tamba hetan kontribusaun maka’as hosi aumentu despeza Governu ba kategoria saláriu no vensimentu no bens no servisu, prinsipalmente liga ho kustu operasionál ba materiál no servisu profisionál relasiona ho atividade kombate pandemia COVID-19,” nota esplika.

Kresimentu PIB iha tinan 2021 kiik rezulta mós hosi investimentu públiku ne’ebé tun ba 16,1% tamba projetu infraestrutura barak la konsegue implementa, tanba pandemia COVID-19 no inundasaun.

Situasaun ne’e kontribui hafraku ezekusaun projetu infraestrutura fíziku lubuk ida no iha tinan 2021, Timor-Leste enfrenta COVID-19 no inundasaun kauza hosi Siklon Seroja iha loron 04 abril ne’ebé limita sirkulasaun ema no sasán.

Previzaun ba 2022

Tuir previzaun relatóriu Asian Development Outlook 2022, Timor-Leste nia PIB sei kontinua sa’e iha tinan 2022 no tinan 2023.

“Ezemplu ba tinan 2022, ADB nia previzaun hatudu ] kresimentu PIB sei sa’e ba 2,5% no iha tinan 2023 sei sa’e ba 3,1%. Projesaun hirak ne’e la-ses hosi kalkulasaun Ministériu Finansas nian,” nota hosi MF relata.

Razaun kresimentu PIB iha 2022 tamba OJE ho valór biliaun $1,95 no taxa ezekusaun orsamentál sei sa’e iha kategoria kapitál dezenvolvimentu no fundu infraestrutura ne’ebé rezulta hosi projetu infraestrutura sira ne’ebé nia prosesu aprovizionamentu hosi Komisaun Nasionál Aprovizionamentu konklui ona iha tinan kotuk no hein atu implementa iha tinan ida-ne’e.

Kondisaun prinsipál atu mantein kresimentu ekonómiku mak estabilidade polítika no estabilidade governativa tanba ho ritmu kresimentu hanesan ne’e, maka ekonomia Timor-Leste sei bele rekupera totál iha tinan 2024 no sei tama filafali ba iha trajetória kresimentu.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here