Osan Dollar Amerikanu. Imajen/Espesiál

DILI, 14 abril 2022 (TATOLI)—Jerente Programa Planeamentu no Parseria, Jaquelina de Aitara Sarmento, informa iha trimestre dahuluk ne’e Institutu Nasionál Dezenvolvimentu Mão de Obra (INDMO) ezekuta ona verba Orsamentu Jerál Estadu (OJE) 2022 atinje ona 25.23%.

“Iha fulan janeiru to’o marsu tinan ne’e, Institutu Nasionál Dezenvolvimentu Mão de Obra ezekuta ona 25.23%, ne’ebé ekivalente ho osan hamutuk $497,529.00,” Jaquelina de Aitara Sarmento hateten ba Agência TATOLI, iha nia knar fatin, Dili, kinta ne’e.

Hosi ezekusaun 25,23% ne’e, nia dehan, fahe ba kategória rua (2) ne’ebé kompostu hosi saláriu no vensimentu 23,61% ho nia saldo $126,636.00 no bens servisu 25,78% ho nia saldo $370,893.00, ne’ebé INDMO aloka ba programa rua (2), sub-programa lima (5) ho nia atividade 12.

Programa rua (2) refere mak boa-governasaun no investimentu no diversifikasaun ekonomia, ho nia sub-programa lima (5) mak boa-governasaun, jestaun institusionál, dezenvolvimentu padraun kompeténsia no rekursu manuál, sertifikasaun no rekoñesimentu ba kompeténsia ka kualifikasaun Mão de Obra no avaliasaun lisensiamentu no akreditasaun hosi sentru formasaun no respetivu ba kursu.

Hosi programa rua (2) no sub-programa lima (5) ne’e mós iha nia atividade 12 mak peskiza planeamentu no dezenvolvimentu, planeamentu dezenvolvimentu estratéjiku no orientasaun polítika, jestaun finanseira administrasaun no finansa, kontrusaun ba edífisiu INDMO iha Tibar, dezenvolvimentu padraun ho nia kompeténsia.

Nune’e mos, prosedimentu definisaun ba padraun kompeténsia no rekursu manuál, monitorizasaun no avaliasaun ba implementasaun padraun, emisaun sertifikadu ba kompetensia, prosedimentu ba sertifikasaun no rekonesimentu kompeténsia, rekoñesimentu no atribuisaun sertifikadu pedalójiku, avaliasaun lisensiamentu operasionál, inklui avaliasaun no akreditasaun.

Entretantu, iha portál transferénsia Orsamentu Jerál Estadu (OJE) 2022 Institutu Nasionál Dezenvolvimentu Mão de Obra (INDMO) nia orsamentu 2022 hamutuk $497,529.00 ne’ebé ezekuta ona 27.8%.

Jornalista : Nelia Fernandes

Editór       : Cancio Ximenes   

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here