Inan-feton ida aprezenta hela oinsá soru-tais bainhira partisipa iha serimónia rekoñesimentu UNESCO ba tais Timor-Leste nu’udar patrimóniu kulturál immateriál mundiál, iha Salaun Suai, Timor Plaza, Dili, segunda (20/12/2021). Imajen Tatoli/António Gonçalves.

DILI, 14 abríl 2022 (TATOLI)—Komisaun D ne’ebé trata asuntu Ekonomia no Dezenvolvimentu iha Parlamentu Nasionál ne’ebé hala’o fiskalizasaun iha Manufahi hatudu rezulatdu katak, Grupu Feto Sorumutk iha aldeia Sesurai, suku Betano, munisípu Manufahi presiza tulun ruma hosi Governu hodi dezenvolvimentu sira-nia atividade soru tais ho seluk tán.

Notísia Relevante: PM lansa rekuñesimentu “tais” sai patrimóniu kulturál mundiál

Deputadu hosi Komisaun D hala’o atividade vizita fiskalizasaun ba munisípu Manuhafi hahú iha loron 23-25 fevereiru 2022 hodi haree direta asuntu ekonómia atu prodús mós relatóriu ne’ebé aprezenta ona iha plenária foin lalais, nune’e husu parte ezekutivu atu bele tau atensaun.

“Grupu feto iha aldeia Sesurai, suku Betano ho atividade hanesan soru tais, suku roupa no homan durante ne’e la’o hela maibé difikuldade mak fatin ka uma ne’ebé utiliza laiha espasu tanba kloot liu no laiha mákina soru tais, tanba durante ne’e soru tais ho de’it manuál,” refere relatóriu Komisaun D ne’ebé Asina direta hosi Prezidente Komisaun D, Antoninho Bianco ne’ebé Agéncia Tatoli asesu, kinta ne’e.

Enkuantu, durante iha fiskalizasaun informasaun ne’ebé relata hosi responsável grupu katak grupu ne’e harii iha 2008 ho membru hamutuk na’in-15 iha inísiu suporta hosi Dirasaun Nasionál Indústria no altura ne’ebá hodi fasilita responsavel grupu ba tuir formasaun iha Indonézia maibé hafoin ne’e Dirasaun nunka vizita ka halo monitorizasaun, nune’e atividade paradu no iha 2016 kontinua hola inisiativa fali entre feto maluk sira.

Notísia Relevante: PN aprova votu kongratulasaun ba “tais” sai patrimóniu mundiál

Hafoin ne’e, grupu feto ne’e hetan suporta hosi Organizasaun Naun Governamentál (ONG) Luta Hamutuk ba Futuru hodi harii uma natón ida no mós apoiu ho mákina suku roupa rua.

Atividade ne’ebé hala’o to’o daudaun ne’e hanesan soru tais ho sistema manuál, suku roupa ho homan bote, luhu, lafatik, biti no seluk tán.

Difikuldade ne’ebé hasoru mak atividade soru tais sei manuál hela, kabas ba soru tais depende ba ema sosa ona produtu ne’ebé iha foin mak ba sosa fali kabas hodi kontinua soru fila-fali no mós fatin ne’ebé iha ladún iha espasu tanba kloot liu.

Durante ne’e, preokupasaun hirak ne’e hato’o liuhosi proposta eskrita ba ministéiru relevante maibé to’o ohin loron seidauk hetan resposta ruma.

Sujere mós ba Governu oinsa prioritiza plantasaun kabas iha futuru hodi utiliza ba iha indústria soru tais hodi nune’e prezerva orijinalidade loloos Timor-Leste nian.

Notísia Relevante: 16 Dezembru, UNESCO sei anunsia “Tais” sai Patrimóniu Kulturál-Immateriál mundiál

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here