Ministru Koordenadór Asuntu Ekonómiku, Joaquim Amaral, Sekretáriu Estadu Juventude no Desportu, Abrão Saldanha hamutuk ho Sekertáriu Estadu Komunikasaun Sosiál, Merício Juvinal dos Reis ‘Akara’, realiza atividade Meet the Press hodi relata atinjimentu VIII Governu Konstitusionál, iha salaun PCM, Palásiu Governu, kuarta (14/04). Imajen Tatoli/Francisco Sony

DILI, 14 abril 2022 (TATOLI)–Ministru Koordenadór Asuntu Ekonómiku (MKAE), Joaquim Amaral, hateten, hafoin Governu introdús medida rekuperasaun ekonómika iha ámbitu pandemia COVID-19, iha empreza eziste fali no rejista foun hamutuk 3.984 iha tinan 2021.

Ministru Koordenadór Asuntu Ekonómiku, Joaquim Amaral. Imajen TATOLI/Francisco Sony

“Empreza hirak ne’e barak opera iha setór produtivu, okupa kedas 2.700 resin no iha empreza ne’ebé opera iha agrikultura hamutuk 58. Hosi númeru ne’e, TradeInvest emite sertifikadu investimentu ho númeru signifikante,” Ministru relata liuhosi programa ‘Meet the Press’, hodi relata atinjimentu VIII Governu Konstitusionál, ne’ebé realiza hosi Sekretaria Estadu Komunikasaun Sosiál (SEKOMS), iha salaun Prezidénsia Konsellu Ministru (PCM, sigla portugés), Palásiu Governu, kinta ne’e.

Tuir Ministru, empreza balun eziste filafali tanba ho medida rekuperasaun ekonómika hanesan programa Cesta Bázika fó vantajen boot ba empreza lokál.

Notísia relevante: Governu ofisialmente enserra distribuisaun Cesta Bázika

Governu mós rejista empreza haat ho valór investimentu millaun $19 iha tinan 2021, investe iha setór produtivu hanesan agrikulta no turizmu.

Enkuantu, iha tinan 2022 konsege rezolve tan investimentu pendente hanesan Pelican Paradise ne’ebé foin lalais asina ona akordu investimentu iha fulan-maiu no sei halo lansamentu hatúr fatuk dahuluk.

Governante ne’e dehan, planu rekuperasaun ekonómika dezeña hosi ekipa lidera hosi atuál Ministru Finansa (MF), Rui Augusto Gomes, define iha faze emerjénsia, médiu no tempu naruk.

Iha faze emerjénsia ho medida haat, kompostu hosi medida tulun família sira asesu ba ai-han ka Cesta Bázika, tulun empreza sira atubele iha posibilidade halo atividade ou mantein hodi labele taka atu nune’e labele iha despedimentu (pecat) ba traballadór sira, inklui tulun setór informál sira hetan protesaun ruma iha situasaun defisil.

“Governu aplika medida sira hodi ajuda komunidade iha tinan 2020 fulan ikus no tinan 2021 (tinan tomak). Ita imajina, bainhira medida sira ne’e Governu lahalo iha tinan 2021, Timor-Leste hasoru situasaun todan liu iha tinan 2020, tanba ita hasoru ona COVID-19 no inundasaun, entaun jere medida sira ne’e hodi bele kontinua iha 2021, to’o fim tinan ne’e konsege sai hosi kreximentu negativu,” nia esplika.

Enkuantu, MKAE konklui ona programa ne’ebé nu’udar mós medida ba rekuperasaun ekonómika hanesan seguransa alimentár.

“Iha tinan 2021, Governu aplika medida haat ne’ebé ho seguransa alimentár maibé kuandu iha revizaun orsamentu Governu mós propoin aloka osan ba seguransa alimentár ba família vulnerável sira. Medida ida-ne’e Governu konsege ezekuta no ramata iha fevereiru 2022. Entaun medida sira halo prezensa Estadu iha komunidade ho kondisaun defisil bele asesu ba ai-han. Medida seguransa alimentár konsege distribui ai-han ba benefisiáriu 102.000,” Joaquim informa.

Notísia relevante: MKAE enserra programa seguransa alimentár iha Railaco

Ministru dehan, medida sira iha faze rekuperasaun ekonómika nafatin aplika maibé iha medida hamutuk 71 ho valór millaun $120 resin atribui ba kada ministériu atu hola parte iha planu rekuperasaun ekonómika hanaran ‘rekuperasaun no transformasaun’, ne’ebé konsege ezekuta ho di’ak.

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here