Ministru Asuntu Parlamentár no Komunikasaun Sosiál, Francisco Jerónimo. Imajen/Egas Cristovão.

DILI, 14 abríl 2022 (TATOLI)—Portavós VIII Governu Konstitusionál, Francisco da Costa Jerónimo Martins, informa iha loron 17-19 abríl ne’e Governu sei transporta eleitór sira-ne’ebé hela iha Dili ba sira-nia munisípiu hodi ezerse sira-nia direitu votu iha eleisaun segunda volta ne’ebé realiza iha 19 marsu 2022.

Notísia Relevante: MAE koordena ho CCI-TL transposta eleitór sira vota iha munsípiu

Governante ne’e hateten, Governu sei prepara kamioneta 110 hodi fasilita no tula votante sira ba ida-idak ninia munisípiu azetu Rejiaun Administrativa Eespesiál Oé-Cusse Ambeno (RAEOA).

“Governu esforsu hodi prepara kamioneta hamutuk 110 hodi tula eleitór sira ba ida-idak nia munisípiu iha loron 17-18 abríl 2022, ezetu Rejiaun Administrativa Espesiál Oé-Cusse Ambeno (RAEOA),” Portavós Governu ne’e hateten ba jornalista sira, iha salaun VIP Ministériu Administrasaun Estatál, Caicoli Dili, kinta ne’e.

Atuál Ministru Asuntu Parlamentar Komunikasaun Sosiál (MAPKOMS) ne’e hateten, hosi kamioneta 110 ne’e Governu prepara kamioneta 26 no restante hosi setór privadu sira-ne’ebé hamahan-an iha Kâmara Komérsiu Indústria Timor-Leste (CCI-TL).

Iha loron 17 abríl, hahú tuku 10h00, Governu sei transporta uluk eleitór sira hosi munisípiu Baucau, postu adminiatrativu Quelicai no Baguia; Munisípiu Bobonaro, postu adminiatrativu Lolotoe no postu adminiatrativu Cailaco; Munisípiu Ermera, postu Adminiatrativu Atsabe no Letofoho maibé Munisípiu Covalima, Lautém no munisípiu Viqueque, postu adminiatrativu hotu-hotu.

Iha loron 18 abríl tuku 12h00, nia dehan, sei transporta tán eleitór sira hosi munisípiu Aileu, Ainaro, Manufahi, Liquiça, Manatuto, munisípiu Baucau mak postu administrativu Vemasse, Venilale, Laga no postu adminiatrativu Baucau Vila; Munisípiu Ermera, postu adminiatrativu Ermera, Hatolia, Railako no Gleno; no Munisípiu Bobonaro, postu adminiatrativu Atabae, Balibo no Maliana.

Governante ne’e hatutan, fatin konsentrasaun eleitór sira hosi rejiaun ida, Munisípiu Baucau, Lautém, Manatuto no Viqueque sei konsentra iha Sentru Konvensaun Dili (CCD-sigla portugés)

Rejiaun rua, Munisípiu Aileu, Ainaro, Manufahi no Covalima sei konsentra iha Tribunál Rekursu Caicoli nia oin no rejiaun tolu, eleitór sira hosi Munisípiu Liquiça, Ermera no Bobonaro sei konsentra iha Tasi-Tolu.

Nia apela ba eleitór sira atu labele sena malu ka hadau malu tanba transporte prontu durante loron markadu to’o oras determinadu.

“Husu atu ita-boot sira ida-idak kuidadu nia-an durante viajen,” nia hateten.

Reprezenta Governu ne’e informa, bainhira atu viajen husu prepara kartaun eleitorál nune’e bele ezerse ita-boot sira-nia direitu votu iha eleisaun prezidensiál segunda volta nian.

Notísia Relevante: Governu prepara kamioneta 100 transporta eleitór sira vota iha munisípiu

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here