Tékniku sira hatudu hela reduzltadu adubu Bio Chart ba to'os-na’in sira iha munisípiu Bobonaro. Imajen Tatoli/Sérgio da Cruz.

BOBONARO, 13 abríl 2022 (TATOLI) – Parseiru dezenvolvimentu To’os ba Moris Di’ak (TOMAK) serbisu hamutuk ho Diresaun Ministériu Agrikultura no Peska (MAP) munisipál, kuarta ne’e realiza atividade formasaun hodi introdús maneira prodús adubu Bio Chart ba to’o-na’in sira iha munisípiu Bobonaro.

Jerente TOMAK Rejionál Bobonaro, Florêncio da Costa, esplika atividade ne’e realiza atu hakbiit kapasidade to’os-na’in sira oinsá bele iha koñesimentu kle’an atu prodús no utiliza adubu ne’e hodi hasa’e produsaun agríkola.

Atividade ne’e foka liu ba to’os-na’in sira-ne’ebé kuda hare-mean iha suku tarjetu sira hosi postu administrativu Maliana Vila, Cailaco no Balibo, liuliu agrikultór sira iha suku Batugade durante tinan lima ona, maibé to’os-na’in sira barak mak la prátika ho regulár.

“Ita lori to’os-na’in sira mai iha-ne’e atu aprende liután hosi prátika ne’ebé sira halo atu nune’e bele hetan informasaun foun, atubele hatutan ba agrikultór sira seluk oinsá mak bele implementa maneira ne’e ho di’ak iha idak-idak nia to’os no natár,” nia informa ba jornalista sira, iha Soso, Maliana.

Adubu Bio Chart daudaun ne’e implementa ona iha fatin balun konsege hatudu progresu di’ak tanba hare moris mai hún ida bele iha oan hosi 15 to’o 20 kompara ho hare ne’ebé la utiliza adubu Bio Chart prodús de’it hare isin menus.

Maneira prátika adubu Bio Chart mak hanesan prepara materiál primária mak hare-kulit, sunu durante oras-haat halo sai anár rega halo mate, foti lori mai sai adubu hanesan anár kahur ho adubu kímika urea grama 0,60, KCL grama 0,40, maibé kompara adubu kímika natoon de’it barak liu mak hare-kulit.

“Sira bele prátika uza mákina modernu no bele mós uza manuál, ne’ebé depende ba agrikultór sira atu hili ida-ne’ebé di’ak no merese liu tuir sira-nia kapasidade, ne’ebé bele halo hodi implementa iha sira-nia to’os, natár no plantasaun ne’ebé faz-parte ba ortikultura nian,” nia esplika.

Seniór Estensionista Servisu Agrikultura Munisípiu Bonbonaro, Justino Belo, konsidera programa TOMAK ne’e mós korresponde ho polítika MAP nian atu redús importasaun adubu kímika.

“Ami-nia haree ida-ne’e hanesan halo estudu komparasaun mai agrikultór sira nune’e tékniku estensionista sira fila hosi formasaun ne’e bele habelar ba ita-nia grupu to’os-na’in no inan-aman sira bele asegura tékniku ida-ne’e hodi halo tán espansaun,” nia subliña.

Tuir dadus hosi TOMAK durante tinan lima, agrikultór munisípiu Bobonaro iha suku tarjetu sira hamutuk 200 iha postu administrativu Cailaco, Maliana no Batugade ne’ebé mak iha poténsia liu ba kuda hare-mean no to’os-nain kuda produsaun liis, fore-rai no fore-mungu kobre hotu postu administrivu lima, falta de’it postu administrativu Lolotoe.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here