Sekretáriu Estadu Kooperativa, Elizário Ferreira, hamutuk ho delegasaun hosi Ministériu Komérsiu Indonézia hasai foto hamutuk iha feira nasionál kooperativa, iha Bairro Pité, tersa (13/04). Imajen TATOLI/Egas Cristóvão

DILI, 13 abril 2022 (TATOLI)—Sekretaria Estadu Kooperativa (SEKoop, sigla portugés) hamutuk ho Federasaun Hanai Malu (FHM), kuarta ne’e, realiza feira hodi promove produtu lokál koooperativa ba merkadu rejionál no nasionál.

Sekretáriu Estadu Kooperativa, Elizário Ferreira, hateten objetivu feira ne’e atu hatan ba ekipa Tékniku Ministériu Komérsiu Indonézia, ne’ebé mai vizita no halo levantamentu ba atividade ekonomia iha Timor-Leste.

“Parte kooperativa organiza atividade ne’e atu hatudu ba delegasaun katak ita preparadu tama ba Asosiasaun Nasaun Sudeste Aziátiku (ASEAN, sigla inglés), ita-nia movimentu kooperativa preparadu atu oferese produtu ba merkadu Ázia,” Sekretáriu Estadu informa iha salaun FHM, Bairro Pité.

Notísia relevante: Ekipa téknika Indonézia no Timor-Leste diskute preparasaun adere ba ASEAN

Sekretáriu Estadu Kooperativa, Elizário Ferreira, akompaña delegasaun hosi Ministériu Komérsiu Indonézia, hala’o vizita ba feira nasionál kooperativa, iha Bairro Pité, tersa (13/04). Imajen TATOLI /Egas Cristóvão

Tuir governante ne’e, atividade ne’e buka atu promove produtu la’ós de’it iha nível rejionál no nasionál de’it, maibé mós ba nível internasionál.

“Normalmente iha situasaun hanesan ne’e maka parte SEKoop nafatin akompaña, monitoriza no superviziona, atu nune’e kreatividade hotu iha ninia kualidade no sustentabilidade, hodi ikus mai oferese ba merkadu, labele iha espasu mamuk atu asesgura merkadu ida sustentável efisiente no efikásia liután,” nia akresenta.

Produtu ne’ebé parte kooperativa promove mak hanesan, tais homan inklui produtu lokál seluk tan.

Iha fatin hanesan, Resposável Grupu Hadomi Kultura, Adelina Freitas, ne’ebé hola parte iha feira, sente kontente tanba bele fa’an produtu lokál hanesan tais.

“Ha’u sente kontente tebes partisipa iha feira ne’e, tanba hatudu katak Estadu tau-matan duni ba produtu ne’ebé ami halo,” nia tenik.

Reprezentante Ministériu Estranjeiru Repúblika Indonézia, Berlianto Situngkir, apresia ho inisiativa ne’e no kontente bele partisipa iha feira nasionál.

“Ami kontente partisipa iha feira promosaun produtu lokál ne’ebé ohin SEKoop realiza. Ida-ne’e hatudu Timor-Leste iha mundansa ba kreatividade. Ami-nia esperansa hosi indústria kreativu ne’e bele sai lukrutivu ekonomia Timor-Leste hodi tama supply chain ASEAN,” nia dehan.

Jornalista : Arminda Fonseca

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here