Adjuntu Sekretáriu Jerál FRETILIN, José Reis.Imajen/Argentina Cardoso

MANATUTO, 13 abríl 2022 (TATOLI)— Ekipa susesu hosi Kandidatu Prezidente Repúblika períodu 2022 too 2027, ho númeru sorteiu 2, Francisco Guterres Lú Olo, kuarta ne’e, realiza diálogu ho apoiante no militante hosi Partidu FRETILIN, Partidu Libertasaun Popular (PLP), Kmanek Haburas Unidade Nasionál Timoroan (KHUNTO) no  apoiante sira iha munisípiu Manatuto.

Iha diálogu ne’e, Adjuntu Sekretáriu Jerál FRETILIN, José Reis, divulga knaar Prezidente Repúblika nian ba komunidade, programa prioridade Kandidatu-nian no husu Manatuto-oan atu fó votu Lú-Olo hodi reeleitu ba Xefe Estadu.

“Knaar importante ida ba Prezidente atu halo mak haree funsionamentu Estadu nian hotu, Prezidente mós tenke servisu hamutuk ho órgaun soberania tolu seluk hodi garante nasaun nia nesesidade, maske sira nia servisu keta-ketak, maibé objetivu ida de’it atu lori nasaun ne’e ba oin,” José Reis hateten liuhosi intervesaun iha Manatuto.

Reeleitu ba PR sei sai Prezidente Repúblika  ida ne’ebé hametin simbólu unidade nasionál hodi ka’er metin timoroan hotu liuliu tau matan ba povu nia moris ho dignu no iguál.

“Importante liu mak sai Xefe Estadu ida ne’ebé tau matan ba povu hotu iha rai ne’e no sai hanesan komandante supremu ba Forsa Armada F-FDTL nian atu asegura pás no estabilidade iha nasaun ne’e,” nia esplika.

Ho nune’e, José Reis husu ba Manatutu-oan hotu atu haree fó votu konfiansa ba Francisco Guterres Lú Olo tanba iha kapasidade no kalma atu foti desizaun hotu ba distinu nasaun nian no sei garante estabilidade iha Timor-Leste no koopera di’ak ho Governu atu aseleira prosesu dezenvolvimentu.

Iha fatin hanesan, Vise Prezidente Partidu Libertasaun Popular (PLP), Maria Angelina Lopes Sarmento husu mós ba militante PLP nian iha Manatuto no militante partidu seluk sira atu vota ba Lú Olo iha eleisaun mai ne’e.

“Ha’u husu ba ita hotu iha ne’e atu vota ba ita nia kandidatu Lú Olo tanba nia-ema ida ne’ebé firme iha nia desizaun no sei la halimar ho desizaun Estadu nian,” nia rekomenda.

Iha diálogu ne’e partisipa másimu hosi militante partidu FRETILIN, PLP, KHUNTO, Frente Mudansa (FM), Os Verdes de Timor no seluk tan.

Díalogu ne’e mós hetan seguransa másimu hosi Polisia Nasionál Timor – Leste (PNTL) Munisípiu Manatuto no hetan  observa direita hosi Komisaun Nasionál Eleisaun (CNE-sigla Portugés) no observadór internasionál sira.

Notísia relevante: UNIJMA setór III deside apoia Lú-Olo iha eleisaun segunda volta

Jornalista: Hortencio Sanchez

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here