Ministériu Saúde realiza hamutuk ho parseiru internasionál no nasionál sira realiza semináriu kona-ba haforsa kapasidade setór saúde hodi resposta ba sistema servisu intergradu ita Timor-Leste. Iha Timor Plaza, kuarta (13/04). Imajen Tatoli/Francisco Sony

DILI, 13 abríl 2022 (TATOLI)— Ministériu Saúde hamutuk ho United Nations Population Fund (UNFPA), kuarta ne’e, realiza semináriu nasionál ho tema ‘haforsa Kapasidade Setór Saúde hodi resposta ba Violénsia Bazeia Jéneru (VBJ): Integra servisu VBJ iha Sistema Saúde Institusionál”.

Iha semináriu ne’e, Vise Ministru Sáude Bonifacio “Maucoli” dos Reis, hateten Violénsia Bazeia ba Jéneru sai ona hanesan asuntu problema saúde públika liuliu kontinua sai violasaun komún ba problema direitu umanu iha nasaun jovén Timor-Leste.

“Kazu ne’e sériu no presiza ema hotu nia atensaun no serbisu maka’as partikularmente setór saúde nia intervensaun hodi halo prevensaun no resposta ba kazu violénsia Bazeia ba Jéneru. Tanba setór saúde jeralmente sempre sai hanesan primeiru pontu ba kontaktu kazu violénsia bazeia ba jéneru,” Vise Ministru Saúde bainhira halo abertura ba semináriu ne’e iha Timor Plaza.

Prevalénsia violénsia kontra feto no labarik feto-sira, tuir Peskiza Demográfika Saúde Timor-Leste tinan 2016 nian, hatudu katak un-tersu (33%) husi feto sira ho idade tinan 15 too 49 sofre ona asaltu fíziku hosi kedas bainhira sira sei tinan 15.

Governu Timor-Leste aprova ona lei no polítika nasionál atu responde ba kazu violénsia bazeia ba jéneru no reafirma kompromisu Governu nian ba konvensaun internasionál sira ligadu ba responde ba violénsia kontra feto no labarik feto sira.

Nune’e, Governu Timor-Leste toma pozisaun ida forte liuhusi promulga Lei Kontra Violénsia Doméstika iha tinan 2010, no deskreve violénsia doméstika hanesan krime públiku, inklui violénsia fízika, psikolójika, seksuál no ekonómika. Susessivamente, Governu Timor-Leste mós aprova ona iha 2012 no 2017 no daudaun halo hela revizaun ba Planu Asaun Nasionál ba Violénsia Bazeia Ba Jéneru ba tinan 2022 too 2027.

Iha tinan 2018, Governu Timor-Leste liuhusi Ministériu da Saúde aprova ona Matadalan Nasionál ida ba Setór Saúde atu responde ba Violénsia Bazeia ba Jéneru iha Timor-Leste. Asaun sira ne’e hotu, hatudu katak Governu Timor-Leste kontinua komprometidu atu responde ba kombate no halakon VBJ iha Timor-Leste iha forma multisetorál.

Iha fatin hanesan, Reprezenatnte UNFPA iha Timor-Leste, Lorna Rolls, informa UNFPA iha kolaborasaun ho Ministériu Saúde hodi haforsa kapasidade setór saúde hodi responde  ba violénsia bazeia ba jéneru  liuhusi estabelesimentu espasu iha fasilidade saúde , treinamentu ba pesoál saúde.

“Ha’u fiar katak worshop ida ne’e sei fornese oportunidade ne’ebé sufisiente atu elabora oinsá ita bele integra servisu violénsia bazeia ba jénereu ba iha Sistema Saúde iha Timor-Leste,” nia akresenta.

Entretnatu, Ministériu Saúde harii ona uma-mahon iha munisípiu ualu hanesan Dili, Bobonaro, Ermera, Liquiça, Viqueque, Covalima, Baucau no Rejiaun Administrasaun Espesiál Oé-Cusse no Ambeno (RAEOA) atu atende ba ema ne’ebé hetan violénsia bazeia ba jéneru.

Notísia relevante: MS hahú koordena ministériu kompetente implementa Lei Sistema Saúde

Jornalista : Felicidade Ximenes

Editór       :  Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here