Ministru Ensinu Superiór Siénsia no Kultura, Longuinhos dos Santos, akompaña ho Sekretáriu Estadu Komunikasaun Sosiál, Merício Juvinal dos Reis ‘Akara’, hala'o atividade ‘Meet the Press’ hodi relata ajintimentu VIII Governu Konstitusionál, iha salaun PCM, Palásiu Governu, kuarta (13/04). Imajen TATOLI/Francisco Sony

DILI, 13 abril 2022 (TATOLI)–Ministériu Ensinu Superiór Siénsia no Kultura (MESSK) iha ona planu iha tinan 2023 sei estabelese kursu doutoramentu iha Universidade Nasionál Timor-Lorosa’e (UNTL) hodi fó oportunidade ba dosente sira.

“Agora esforsu sira ne’ebé tenke halo mak hahú serbisu hamutuk ho Komunidade País ho Lian Portugés (CPLP) hanesan Portugal atubele haree liután preparasaun hodi aselera prosesu. Ministériu hamutuk ho UNTL halo koordenasaun no hein tinan oin bele implementa,” Ministru Ensinu Superiór Siénsia no Kultura, Longuinhos dos Santos, relata iha ámbitu ‘Meet the Press, iha salaun Prezidénsia Konsellu Ministru (PCM, sigla portugés), Palásiu Governu, kuarta ne’e.

Notísia relevante: MESSK sei halo observasaun ba pedidu loke kursu doutoramentu DIT

Tuir governante ne’e, bainhira kursu doutoramentu loke ona, dosente hosi instituisaun superiór privadu no públiku iha posibilidade boot tebes asesu ba kursu ne’e.

Tanba ne’e, programa prioridade MESSK ne’e sei hatama iha planu orsamentu jerál tinan 2023, nune’e bainhira iha aprezentasaun planu anuál bele konvense Parlamentu Nasionál hodi aprova.

Aleinde ne’e, Dili Institute of Technology (DIT) antes ne’e submete proposta ba ministériu kona-ba planu estabelese kursu doutoramentu.

“Ita presiza halo avaliasaun no observasaun uluk ba sira-nia preparasaun, saida maka DIT prepara hodi dudu sira hakarak loke kursu doutoramentu iha sira-nia Instituisaun. Ha’u haruka ona ekipa halo avaliasaun, maibé prosesu ne’e ha’u seidauk simu ninia rezultadu,” Ministru informa.

Jornalista : Tomé Amado

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here