F-FDTL, udade komponente Naval iha sira nia aniversariu ba dala 20 iha Hera kuarta, 12/1/2022. Imajen TATOLI/Antonio Dasiparu

DILI, 13 abríl 2022(TATOLI)— Ministériu Defeza (MD), prevee millaun $1 hodi halo akizasaun karreta hamutuk 10 ba Komandu FALINTIL- Forsa Defeza Timor-Leste (F-FDTL), atu apoia atividade serbisu operasionál komandu nian.

“Ita halo akizasaun ba veíkulu Estadu hamutuk 10 ba ita nian Forsa Armada hodi fó apoia ba sira nian atividade operasionalizasaun nian. Orsamentu ba akizasaun ne’e hamutuk millaun $1 hosi Orsamentu Jerál Estadu (OJE) 2021 nian,” Diretór Jerál Administrasaun Finansa, Ministériu Defeza, Nuno Carvalho hafoin seremónia entrega karreta hamutuk 10 ba Komandu F-FDTL iha Kuartél Jerál F-FDTL, Fatuhada, kuarta ne’e.

Razaun MD sosa karreta ne’e, nia dehan tanba karreta 30-resin ne’ebé sosa hosi Malázia fó ba Forsa Armada daudaun ne’e kondisaun aat hotu ona.

MD sosa karreta ne’e tuir prosesu normál ka konkursu públiku hodi kompañia halo akizasaun ba karreta ho modelu Isuzu NDS boot ida no Insuzu D-MAX  hamutuk sia.

Iha biban hanesan, Vise Xefe Estadu Maiór Jenerál F-FDTL, Majór Jenerál Calisto dos Coli ‘Coliati’, afirma akizasaun ba veíkulu ne’e pasu importante ba iha Forsa Armada tanba bele ajuda ona membru F-FDTL halo servisu Iha terenu ho di’ak.

“Ha’u hanoin karreta sanulu inklui mini Hikon ne’e sufisiente ona tanba barak ka oituan ne’e la’ós kestaun maibe bele ajuda ita,” nia agradese.

Entretantu,  Diretór Kompañia Timor Safari, Kenneth Lay, hateten, nia parte mak manán konkursu ba iha akizasaun karreta ba Ministériu Defeza.

“Karreta sira ne’e ha’u importa hosi Thailandia no nia kualidade ne’e garante no manutensaun ba karreta sira ne’e ami fó garansia tinan ida. Karik karreta sira aat kompania rasik mak sei halo manutensaun no liu tiha tinan ida mak depende ba Komandu F-FDTL atu kontrata fali Kompañia seluk hodi halo manutensaun.

Jornalista: Natalino Costa

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here