Sekretáriu Jerál Partidu FRETILIN, Marí Alkatiri.Imajen/Argetina Cardoso

OÉ-CUSSE, 13 abríl 2022 (TATOLI) – Bainhira kandidatu Prezidente Repúblika, Francisco Guterres ‘Lú Olo’ manán iha eleisaun prezidensiál volta daruak, Sekretáriu Jerál FRETILIN, Marí Alkatiri promete fila-hikas haforsa dezenvolvimentu Rejiaun Administrativa Espesiál Oé-Cusse Ambeno (RAEOA).

Mari Alkatiri ko’alia iha ámbitu kandidatu Prezidente Repúblika períodu 2022-2027 ho númeru sorteiu 2, Francisco Guterres Lú Olo, kuarta ne’e hala’o kampaña eleitorál volta daruak ho tipu komísiu aberta iha kampu futeból Oébau, sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA).

Maske, kampaña aberta ne’e kandidatu Lú-Olo la partisipa, maibé reprezenta hosi Sekretáriu Jerál Partidu FRETILIN, Mari Alkatiri, Vise-Prezidente Partidu Libertasaun Populár (PLP), Demétrio do Amaral de Carvalho no Prezidente kandidatu Partidu Os Verdes de Timor, António Lela Huno.

Iha kampaña ne’e, perante militante no apoiante sira, Alkatiri, husu povu Timor-Leste liuliu Atoni-oan sira atu vota ba kandidatu númeru sorteiu 2, Fransisco Guteres Lú Olo nune’e garante pás no estabilidade hodi kria kondisaun trata veteranu sira-nia vida ho família dignu tuir Konstituisaun RDTL.

Militante no simpatizante partisipa kampaña iha kandidatu Prezidente Repúblika períodu 2022-2027, Francisco Guteres ‘Lú Olo’, iha kampu futeból Oébau. Imajen Tatoli/Abílio Elo Nini.

“Plataforma ne’e iha programa ida, atu harii fundu ida atu hadi’a veteranu sira-nia moris, sira-nia oan no bei-oan nia vida, ida-ne’e mai hosi lei, Prezidente ho Primeiru Ministru konkorda ona, ha’u hanesan koordenadór plataforma, ha’u rasik mak halo proposta ida- ne’e,” Mari Alkatiri, ko’alia iha kampaña kandidatu Lú Olo iha Oé-Cusse.

Tuir nia, Governu ho Estadu tenke kria kondisaun dignu ba veteranu, hosi jerasaun ba jerasaun atubele asesu ba edukasaun, saúde ho kualidade, nune’e bele komprende prosesu dezenvolvimentu nasionál.

Nia fundamenta, programa seluk, Governu preokupa ho buat hotu-hotu, kada tinan funsionáriu hetan saláriu 13, desizaun halo ona, agora estuda hela atu halo lei, hodi aprova orsamentu retifikativu kria fundu ida ba uma-kain hotu-hotu to’o dezembru tinan ikus simu $200, bainhira mai hosi lei, Estadu rekoñese povu nia direitu nu’udar sidadaun Timor-Leste.

“Programa ne’e ba povu la’ós funsionáriu, veteranu sira mós, sei simu pensaun 13, ida-ne’e programa plataforma la’ós bosok, agora jurídiku sira estuda hela atu halo lei ba programa ne’e, tán ne’e ha’u promete bainhira Lú Olo manán, ha’u sei mai Oé-Cusse atu hamutuk ho povu Oé-Cusse atu reforsa dezenvolvimentu iha Oé-Cusse,” nia afirma.

Iha biban hanesan, Prezidente Kandidatu Partidu Os Verdes de Timor, António Lela Huno, hatete, dezenvolvimentu Oé-Cusse sai referénsia ba munisípiu 12, tanba jestaun hosi Mari Alkatiri, tán ne’e atu harii nasaun ida hahú ho modelu dezenvolvimentu, tenke vota ba Lú Olo.

“Maski ita defende halakon kiak no mukit maibé durante tinan 20 ita ukun-aan, só Oé-Cusse maka bele sai modelu dezenvolvimentu atu ita la’o-tuir, tan ne’e ha’u husu ita vota ba prezidente Lú Olo atu hatutan mehi ne’e ba munisípiu seluk, Oé-Cusse mak sai modelu dezenvolvimentu ba lideransa hotu, tantu fundadór no joven, no partidu hotu atu aprende oinsá mak halo jestaun ba ita-nia Estadu diretu demokrátiku ida-ne’e,” nia katak.

Xefe Departementu Administrasaun Finansa iha Komisaun Nasionál Eleisaun (CNE, sigla portugés), Sabina Sufa, informa, monitorizasaun ba kampaña kandidatu prezidente repúblika períodu 2022-2027, iha Oé-Cusse la’o di’ak no hakmatek, militante no simpatizante sira hatudu maturidade polítika di’ak iha ámbitu kampaña.

Tuir observasaun Agência Tatoli, iha komísiu ne’e hetan seguransa másima hosi PNTL-FDTL, observasaun internasionál sira hosi Uniaun Europeia (UE),  Komisaun Nasionál Eleisaun, Sekretariadu Tékniku Administrasaun Eleitorál (STAE) no Provedoria Direitu Humanu no Justisa (PDHJ).

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here