Kampaña ikus kandidatu PR Ramos Horta iha Ermera.

DÍLI, 13 abril 2022 (TATOLI) – Kandidatu Prezidente Repúblika, José Ramos Horta, promote katak bainhira eleitu hodi asume kargu ba tinan lima mai hakarak mak kria dame iha rai-laran no li’ur.

“Ha’u hakarak sai Prezidente Repúblika ida buka dame”, Ramos Horta afirma ohin, iha mini kampaña ikus, iha Ermera.

Eis-prezidente ne’e kompromete katak sei la provoka krize iha país ida ne’e.

“Bainhira eleitu sai Xefe Estadu sei serbisu ho maun Xanana Gusmão, partidu polítiku sira hotu ne’ebé mak la’o ho ha’u iha kampaña segunda volta, deputadu sira iha Parlamentu Nasionál, Igreja Katólika, intelektuál sira hodi halo povu moris iha hakmatek nia laran”, dehan.

Ramos Horta akrestenta katak sei la halo diskrimisaun no buka hodi kolabora ho ema hotu-hotu.

Nune’e nia apela mós ba joven sira atu haku’ak malu. “Ha’u lakohi atu iha violénsia. Se iha problema ruma, buka mak solusaun, labele fahe malu, labele mete droga”.

Premiadu Nobel da Paz iha ámbitu kampaña ne’e promete mós ba populasaun Ermera katak sei koopera ho Governu hodi tau-matan ba kafé, formasaun ba produtór kafé sira no kria fundu ida ba produtu ne’e hodi bele halo investimentu fali iha área oioin.

Nia agradese ba konfiansa husi povu Ermera ba rezultadu eleisaun iha primeira volta, no husu atu kontinua fó votu iha eleisaun tuirmai.

Nune’e mós Prezidente Partidu Demokrátiku Repúblika Timor (PDRT), Agostinho Gomes, hatete nia parte iha ona rai ektare 25 iha Railaco hodi dezenvolve kafé no sei bolu joven sira atu serbisu hamutuk.

“Ha’u mós konkorda ho maun Ramos Horta nia planu hodi dezenvolve káfe iha Ermera”, dehan.

Iha sorin seluk, Prezidente Partidu Demokrátiku (PD), Mariano ‘Assanami’ Sabino, husu ba populasaun Ermera atu fó votu ba Ramos Horta ho objetivu mak salva Konstitusaun Repúblika Timor-Leste.

“Kuandu maun Ramos Horta sai Prezidente Repúblika sei tau-matan ba integridade soberania Timor-Leste tantu iha rai maran no tasi”.

Jornalista: Domingos Piedade Freitas

Editora: Maria Auxiliadora

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here