Negosiante sira iha RAEOA fa’an sasán iha ámbitu kampaña eleisaun prezidensiál períodu 2022-2027. Imajen Tatoli/Abílio Elo Nini.

OÉ-CUSSE, 13 abríl 2022 (TATOLI) – Kandidatu Prezidente Repúblika períodu 2022-2027 ho númeru sorteiu 2, Fransisco Guteres Lu-Olo, kuarta ne’e hala’o kampaña eleisaun prezidensiál volta daruak ho tipu komísiu aberta iha kampu futeból Oébau Rejiaun Administrativa Espesiál Oé-Cusse Ambeno (RAEOA), lori sorti di’ak ba negosiante sira tanba hetan rendimentu di’ak hosi atividade negósiu.

“Ohin ami sorti di’ak, ami sente kontenti tanba ohin ami-nia sasán folin, ema barak mak mai hola liuliu bee tanba ohin loron manas, nomoos sigarru, pulsa no doxi, kuandu ema laiha entaun ita la hetan rendimentu di’ak, maibé ohin ema barak ami-nia rendimentu mós di’ak,” negosiante Jacinto Caunan, expresa nia sentimentu haksolok ba Agência Tatoli, iha kampu futeból Oébau Oé-Cusse.

Negosiante Jacinto Caunan. Imajen Tatoli/Abílio Elo Nini.

Tuir nia, iha loron baibain nia hala’o negosiu dudu karosa fa’an iha Palaban, Tasi-ibun, bainhira kaundu kampaña nia esforsu atu hetan fatin atu fa’an sasán, nia kompara loron bainbain hetan $10.00 maibé iha loron kampaña nia bele hetan $50.00 ba leten.

“Iha volta dahuluk, ha’u fa’an hanesan ne’e lori de’it ha’u-nia karosa, foin daudaun kampaña, Ramos Horta, iha Lifau ha’u mós ba ne’ebá, ha’u la’o ba mai de’it, tanba ha’u-nia fatin permanente iha Palaban, tasi-ibun,” nia katak.

Iha biban hanesan, Domingas Quefi, nu’udar negosiante sente kontenti no badinas buka osan, tanba ema barak mak hola sasán iha ámbitu kampaña.

Negosiante Domingas Quefi. Imajen Tatoli/Abílio Elo Nini.

“Ohin ema hola barak, tanba ema barak mai tuir kampaña entaun ha’u mai lori nasi kotak, doxi no batar-sona, no pisang-goren mai fa’an, ohin ne’e ami hetan sufisiente la hanesan bainbain, tanba bainbain ami hetan $5.00, maibé ohin bele hetan to’o $20.00 tanba ema hola barak,” nia komenta.

Nia informa, kampaña ne’e kada tinan lima dala-ida de’it, entaun oportunidade bele fa’an sasán, maski feto maibé osan ne’e importante atu atende nesesidade uma laran.

Nune’e mós Paulo Quefi, husu ba kandidatu prezidente repúblika ba períodu 2022-2027, bainhira sai xefe Estadu presiza servisu hamutuk ho Governu atu hadi’a infraestrura bázika, hodi fasilita komunidade lori produtu ba merkadu.

“Ne’ebé ita husu kuandu sai xefe Estadu tenke tau matan ba povu, hadi’a estrada no fasilita bee-moos, serbsiu hamutuk ho Governu, atu ita bele lori produtu ba merkadu ho di’ak, ida-ne’e mak povu nia persiza,” nia sujere.

Tuir observasaun Agência Tatoli, iha komísiu ne’e hetan seguransa másima hosi PNTL-FDTL, observasaun internasionál sira hosi Uniaun Europeia (UE), Komisaun Nasionál Eleisaun (CNE, sigla portugés), Sekretariadu Tékniku Administrasaun Eleitorál (STAE) no Provedoria Direitu Humanu no Justisa (PDHJ).

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here