Diretór Asosiasaun HAK, Sisto dos Santos. Imajen Tatoli/Nelson de Sousa.

DILI, 13 abríl 2022 (TATOLI)—Diretór Assosiasaun HAK, Sisto dos Santos, husu Komisaun Nasionál Eleisaun (CNE, siglá portugés) no Sekretáriadu Tékniku Administrasaun Eleitorál (STAE) atu hadia mekanizmu iha eleisaun prezidensiál segundu volta, nune’e bele hasa’e taxa partisipasaun hosi eleitór sira.

“Ami rekomenda ba CNE no STAE atu hadi’a mekanizmu eleisaun segunda volta no eleisaun presidensiál sira ba futuru fó biban ba ema hotu atu vota iha ne’ebé de’it hodi asegura populasaun sira-nia partisipasaun iha eleisaun atu sira la lakon direitu ba vota, partikularmente iha sentru votasaun iha teritoriu laran,” Diretór ne’e hateten ba jornalista sira liu hosi konferénsia imprensa iha edifísu HAK, Faról, kuarta ne’e,

Nia informa, tuir HAK nia monitorizasaun deskobre katak kondisaun balu atu hetan konsiderasaun órgaun eleitorál nia intervensaun ba melloramentu sira mak hanesan sentru votasaun paralelu ne’ebé la efikasia kria konfuzaun ba eleitoradu sira prezudika votante lubuk mak la konsege ezerse sira-nia direitu votu.

Seluk mak oras normál ba votasaun husi tuku 07h00 dadeer to’o tuku 15h00 lorokraik ne’e la natón, nune’e iha fatin balun prezudika votante sira balu lakon nia direitu votu tan tarde to’o iha sentru votasaun liu-liu suku balun mak demografikamente komunidade barak ho distansia dook.

Taxa partisipasaun eleitór sira barak la vota tan dezafiu laiha osan atu selu karreta ka ense mina ba motor atu fila ba sira nia suku liu-liu universtariu nomós ba nivel komunidade hirak ne’ebé ho kondisaun insufisiente nia laran.

Eleisaun presidensiál primeira volta liuba ne’e, la asesivel ba ema ho defisiénsia matan no fizíku tamba buletin votu ba ema ho defisiénsia matan laiha inklui sentru votasaun balu laiha rampa ne’ebé susar ba ema ho kadeira roda atu asesu ba vota.

Iha eleisaun primeira volta ne’e prizioneru sira kuaze ema 90-resin lakon direitu votu, tan parte STAE la halo resensiamentu eleitorál no guarda prizionál la organiza sira ho di’ak kontaktu família hodi lori nia kartaun no passaporte atu sira bele ezerse nia direitu ba vota.

Aleinde ne’e, nia dehan, pesoál Polísia Nasionál Timor-Leste (PNTL) nia akomodasaun durante loron no kalan ida halo servisu iha iha estasaun votu sira ho valor $10 ne’e la sufisiente ba sira.

Nune’e, HAK husu Ministériu Interiór atu hasae ka aumenta montante akomodasaun ba membru PNTL sira entre $25-$35 atu sira mós hala’o papél hodi asegura estasaun votu sira iha territóriu nune’e la prezudika ba sira-nia rekursu rasik.

Asosiasaun HAK husu ba Parlamentu Nasionál atu hamosu rezolusaun extraordináriu hodi fó kondisaun ba CNE no STAE, hodi organiza eleitór sira bele vota ho fleksibilidade iha fatin ne’ebé de’it mak nia temporariamente destaka ba espesialmente iha kapital Dili.

“Iha ambitu eleisaun nia ema hotu iha direitu atu partisipa no hola parte iha prosesu eleitorál hodi espresa ninia direitu votu hodi fihir no hili lideransa ida-ne’ebé mak nia hakarak no konfia katak sei reprezenta nia ba kaer ukun, hodi servi ba publiku liu-liu hodi tane no servi povu nia interese hodi hakonu direitu umanu povu nian,” nia hateten.

Jornalista : Nelson de Sousa

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here