Autoridade suku Costa agradese Governu apoia fasilidade hakman serbisu suku. Imajen Tatoli/Abílio Elo Nini.

OÉ-CUSSE, 13 abríl 2022 (TATOLI) – Xefe suku Costa, sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA), Aleixo Abi, agradese ba Governu tanba apoia ona ekipamentu eletrónika komputadór ho mákina impresora atu hakmaan serbisu administrasaun no atendimentu públiku iha suku.

“Ami kontente tebes Governu agora fasilita ona ami komputadór, ba xefe suku 18 iha Oé-Cusse, iha loron sábadu 9 abríl, agora ami uza ona loron tolu hahú segunda to’o ohin, ami sente serbisu kmaan uitoan la hanesan uluk ona,” Xefe suku Costa, Aleixo Abi, expresa nia sentimentu haksolok ne’e iha sede suku Costa, bairru Masin, Oé-Cusse, kuarta ne’e.

Nia informa, ekipamentu eletrónika ne’ebé Governu liuhosi Ministériu Administrasaun Estatál (MAE) oferese maka hanesan komputadór kompleta ho mákina impresora.

“Antes ne’e kada loron ami tenke la’o buka tama sai rentál atu fokokópia no print, mais agora iha ona ami kontente tebes, atu hafasil ami-nia serbisu ba atendimentu públiku ba komunidade sira-nia bainhira tarta dokumentu iha suku,” nia orgullu.

Tuir nia, dezafiu boot ne’ebé lideransa suku sira infrenta, iha 2021 Governu distribuisaun ai-han ba família uma-kain liuhosi projetu cesta bázika susar tebes atu fotokópia dokumentu komunidade nian, inklui halo deklarasaun ruma, hotu-hotu halai ba rentál.

Dalaruma hamosu problema, maibé komunidade hatene problema ne’e, maibé ho sira-nia pasiénsia submete dokumentu iha suku, problema seluk bainhira hato’o relatóriu suku nian ba MAE, dokumentu hotu-hotu tenke produs hosi komputadór.

“Ida-ne’e susar tebes ba xefe suku hotu-hotu, tanba prosesu naruk, sei tama sai rentál atu halo relatóriu sira-ne’e. Maibé agora kuandu halo ami-nia relatóriu la persiza ona, tanba Governu fasilita ona, ita bele halo dokumentasaun suku nian, hanesan bolsa da mãe, ferik katuas, veteranu, Uma Kbiit Laek, ami agradese ba Governu nia tulun,” nia agradese.

Entretantu, bazea dokumentu dadus cesta bázika iha 2021, totál populasaun iha suku Costa hamutuk 17,351 kompsota hosi mane 8,848 no feto 8,503, mai hosi aldeia lima (5).

Iha aldeia Sanane hamutuk 11,237, mane 5,420 no feto 5,817, aldeia Mahata 1,899, mane 908 no 991, aldeia Oétfo hamutuk 1067, mane 544 no feto 523, aldeia Lakufoan hamutuk 707, mane 357 no feto 350, aldeia Oésono hamutuk 2441, mane 1,222 no 1,219.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here