Prezidente Eletrisidade Timor-Leste, Empreza Públika, Paulo da Silva, lansa fornesimentu enérjia elétrika ba komunidade aldeia Helesu to'o aáea Nunudoi, suku Atabae, postu administrativu Atabae, munisípiu Bobonaro. Imajen Tatoli/Sérgio da Cruz.

BOBONARO, 12 abríl 2022 (TATOLI) – Projetu eletrifikasaun iha suku Saburai, postu administrativu Maliana, munisípiu Bobonaro, daudaun ne’e tama ona faze mobilizasaun rekursu materiál.

Komunidade Saburai ne’ebé durante tinan 20-resin ona seidauk asesu enérjia elétrika hamutuk 2.972 ho totál xefe-família 711 kompostu hosi aldeia Tas-Masak, Cosal no Mabiloa.

“Ami hetan orientasaun hosi Primeiru Ministru katak antes remata mandatu suku hotu-hotu tenke asesu ona eletrisidade inklui suku Saburai, ne’ebé kontratu asina tiha ona, agora sira halo preparasaun halo mobilizasaun ba iha implementasaun, espera iha fulan-haat oin mai, sé kompañia sira finaliza lalais ita bele ba halo ona inaugurasaun,” Prezidente Eletrisidade Timor-Leste, Empreza Públika (EDTL, E.P) Paulo da Silva, hato’o promesa ne’e iha suku Atabae, postu administrativu Atabae, munisípiu Bobonaro, tersa ne’e.

Nia dehan, EDTL, E.P halo hosi responde ba VIII Governu nia hakarak mak iha faze dahuluk lansa pakote eletrifikasaun hamutuk pakote 34 iha tinan 2021 kobre 22 suku iha teritóriu nasionál, maibe prosesu aprovizionamentu la’o atrazu até projetu balu foin mak finaliza tanba kestaun pandemia Covid-19 no unundasaun iha loron 4 abríl 2021 liubá.

Iha tinan ne’e, EDTL lansa tán pakote 44 sei kobre suku hamutuk 17 no reabilizatasaun ba projetu liña ezistente no iha munisípiu Bobonaro implementa projetu iha suku Saburai, postu administrativu Maliana no kontinuasaun hosi suku Atabae to’o Ponte Loes no seluk tán.

“Ita hela de’it suku 22 maibé ha’u orienta ona departamentu planeiamentu halo levantamentu hotu tiha ona iha semana kotuk, dezeñu no BOQ kompletu ona,” nia katak.

Bainhira  Prezidente Eletrisidade Timor-Leste, Empreza Públika (EDTL, E.P) Paulo da Silva aprova ona pedidu sei lansa konkursu públiku.

“Ita eperasa tinan ida-ne’e obra hotu ita lansa ona, iha Natál ho tinan foun ita-nia inan-aman bele asesu ona ahi,” nia promete.

Notísia relevante: Uma-kain 162 iha suku Atabai asesu ona enerjia elétrika

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

1 KOMENTÁRIU

  1. Chefe do Suku Lour Postu Administrativu de Bobonaro hakarak Deklara katak husi Suku Lour Komunidade Aldeia 3 mk to,o agr sedauk asesu ba linha eletrisidade ho tempu nebe naruk tebes, maske ami hato,o ona problema ne liu husi Proposta bebeik ba iha Governu Sentral maibe ate a data la hetan resposta. ho nune hakarak husu ho hakraik an karik bele hare no rona mos ami ny prekupasaun ida ne. ba atensaun tomak lahaluha hato,o Obrigadu Wain.
    Lour, 13/4/2022

HAKEREK NO HATÁN

Please enter your comment!
Please enter your name here