PNDS RAEOA entrega ona UKL faze dahuluk unidade neen ba komunidade. Imajen Tatoli/Abílio Elo Nini.

OÉ-CUSSE, 12 abríl 2022 (TATOLI) – Programa Nasionál Dezenvolvimentu Suku (PNDS) iha Rejiaun Administrativa Espesiál Oé-Cusse Ambeno (RAEOA), entrega ona projetu Uma Kbiit Laek (UKL) faze dahuluk unidade neen ba komunidade tanba progresu konstrusaun remata ona ho 100%.

“Konstrusaun UKL períodu 2021 iha Oé-Cusse suku tolu remata ona hamutuk unidade neen, ita entrega ona ba komunidade, tanba progresu ho serbisu tomak remata ona ho 100%,” Diretór PNDS RAEOA, Sebastião Tanesi, informa ba Agência Tatoli iha Oé-Cusse, tersa ne’e.

Tuir nia, unidade neen iha suku tolu ne’e, unidade rua iha suku Cunha, sub-rejiaun Pante Makasar, unidade rua iha suku Bobometo, sub-rejiaun Oé-silo no unidade rua iha suku Suni-Ufe, sub-rejiaun Nítibe, hela unidade 30 iha suku 15 iha terRitóriu Oé-Cusse.

“UKL faze dahuluk Oé-Cusse hetan unidade 36 ba suku 18, agora hela unidade 30, ho nia progresu kontrusaun atinje ona 70,13%, suku balu atinje ona 70%, balu iha 40%, no balu atinje ona 50%, tÁn ne’e mak ami soma hamutuk iha Oé-Cusse atinje ona 70%,” nia katak.

Parte PNDS sei esforsa nafatin iha suku balu progresu seidauk sa’e tanba kondisaun estrada tempu udan, entaun iha fulan-marsu to’o abríl ne’e serBisu kontinua paradu, tanba asesu ba transporte atu transporta materiál ba iha baze susar tebes, maibé agora udan-been komesa menus ona, entaun iha abríl to’o maiu, PNDS sei esforsu atu kontinua konstrusaun sira ne’e.

“Ha’u iha komitmentu katak tarde liu iha maiu nia laran ita sei entrega hotu, tanba 70% ne’e balu plafon sinta hotu ona, hela serbisu ki’ik balu maka seidauk, só progresu mínimu liu maka suku Taiboko tanba foin 25% tanba fatin ne’e izoladu liu iha Oé-Cusse, estrada atu tama kontrusaun ne’e rai tahu sei bokon entaun susar tebes atu transporte asesu ba to’o ne’ebá,” nia akresenta.

Iha tinan fiskál 2021 Governu harii Uma Kbiit Laek hamutuk unidade 1.254 iha suku 424 iha teritóriu nasionál ho montante orsamentu hamutuk $25,000.000 ho kustu ba kada uma purvolta $14,000 to’o $17,000.

Projetu Uma Kbiit Laek, ne’ebé konstrui komposta hosi modelu rua, modelu 48 m2, inklui kuartu tolu (3), sala vizíta ida (1) no dapur ida (1), modelu 37 m2 inklui kuartu rua (2), sala vizita ida (1) no dapúr ida (1).

Nune’e iha RAEOA medida konstrusaun UKL la hanesan balu 48 m2 balu 37 m2 , no totál orsamentu ne’ebé Governo sentrál liuhosi Ministériu Administrasaun Estatál (MAE) aloka ba UKL unidade 36 iha Oé-Cusse hamutuk $611,296.00.

Notísia relevante: Kondisaun estrada difikulta ezekusaun UKL faze dahuluk iha RAEOA

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here