Ministru Edukasaun Joventude no Desportu, Armindo Maia. Imajen Tatoli/Francisco Sony

DILI, 12 abril 2022 (TATOLI)–Ministériu Edukasaun Juventude no Desportu (MEJD) sei realiza formasaun lian portugés ba profesór timor-oan 4.300 iha territóriu nasionál, tinan ne’e, atu hasa’e abilidade no koñesimentu hanorin ba estudante sira.

“Formandu timor-oan na’in-53 ne’ebé termina ona formasaun lian portugés ho profesór portugés sira liuhosi projetu PRO-Portugés mak sei fó formasaun ba profesór timor-oan sira,” Ministru Edukasaun Juventude no Desportu (MEJD), Armindo Maia, hateten iha salaun enkontru Prezidénsia Konsellu Ministru (PCM, sigla portugés), Palásiu Governu, segunda ne’e.

Notísia relevante: Profesór 152 tuir formasaun área siénsia matemátika iha Covalima

MEJD sei realiza kooperasaun ho institutu kooperasaun no lian, Camões hodi realiza formasaun ne’e tanba konsidera lian portugés hanesan lian ofisiál.

“Bainhira formasaun tinan ne’e ramata, parte ministériu sei kontinua fali ba tinan oin. Sei iha kooperasaun entre Governu Timor-Leste liuhosi MEJD ho Governu Portugal liuhosi Camões, nune’e bele kontinua kapasita timor-oan sira,” nia akresenta.

Antes ne’e, MEJD simu informasaun barak hosi entidade instituisaun públiku no privadu inklui sosiedade sivíl sira katak profesór timor-oan barak la hanorin estudante sira ho lian portugés iha sala aula.

“Ita fiar tinan oin mai, formasaun ba profesór sira bele kontinua nafatin ho númeru profesór hahú hosi 3.000 to’o 4.000,” Ministru akresenta.

Governante ne’e promete, hahú tinan ne’e ba oin parte ministériu sei halo esforsu hodi kapasita profesór sira, nune’e bainhira mandatu VIII Governu Konstitusionál ramata, profesór balun mak hetan ona kapasitasaun.

Nune’e mós, MEJD halo kooperasaun ho United Nations Educational, Scientific and Cultural hodi daudaun ne’e kapasita disiplina Matemátika no Siénsia ba profesór hosi siklu 1,2 iha territóriu nasionál.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here