Xefe Estadu Maiór F-FDTL, Tenente Jenerál Falur Rate Laek, foto hamutuk Komandante Komponente Aéreu Tenente Koronél Helder da Costa, ne’ebé akompaña ho dirijente F-FDTL,hafoin seremónia pose. Imajen/Natalino Costa.

DILI, 12 abríl 2022 (TATOLI)— Komandu FALINTIL-Forsa Defeza Timor-Leste (F-FDTL) liuhosi Xefe Estadu Maiór Jenerál F-FDTL, Tenente Jenerál Falur Rate Laek, tersa ne’e, fó pose ba Tenente Koronél Helder da Costa hodi lidera Komponente Aéreu.

Iha diskursu, Tenente Jenerál Falur Rate Laek, hateten Estadu Timor-Leste desde estabelese Formasa Armada iha mehi ida atu kria Komponente Aéreu, nune’e iha tinan ne’e realiza duni no komandante komponente ne’e simu ona pose atu hala’o responsabilidade.

“Ha’u husu ba Estadu Timor-Leste liuhosi Governu tenke investe atu dezenvolve di’ak liután Komponente Aéreu atubele iha fasilidade adekuandu hodi sai komponente ne’ebé profisionál iha futuru,” Tenente Jenerál ne’e hateten iha Kuartel Jenerál F-FDTL-Fatuhada, tersa ne’e.

Komandu F-FDTL hosi Governu tenke prioritiza investe iha área rekursu umanu, nune’e bele sai alizerse ida ba komponente aéreu.

“Ita hotu hatene, Estadu hahú investe ba komponente áereu, hodi prepara rekursu ne’ebé daudaun ita iha nain-15, kompostu hosi pilotu nain-tolu. Ha’u hanoin ida ne’e sufisiente ona tanba membru balun estuda ona iha área aéreu nian iha Filipina.  Maibé seidauk sufisiente ne’ebé Governu presiza investe rekursu umanu no ekipamentu, nune’e ita nia komponente aéreu sai forsa profisionál,” Komandante F-FDTL ne’e informa.

Komandu F-FDTL mós agradese ba VII Governu Konstitusionál liuhosi eis Ministru José Agostinho Siqueira Somotxo ne’ebé estabelese akordu ho na’in ba Aéreu Dili, hodi oferese aviaun ida ba F-FDTL iha momentu ne’ebá.

Nune’e, iha tempu badak Governu Estadu Unidu Amérika (EUA) sei apoia  elikópteru ida ba Forsa Defeza Timor-Leste.

“Ha’u husu ba Komandante Komponente Navál foun atu kontinua aprende no hatene rona tanba área aéreu ne’e foun liga ba siénsia no teknolojia aéreu nian,” Komandante ne’e enkoraja.

Iha biban hanesan, Komandante Komponente Aéreu, Tenente Koronel Helder da Costa, hateten nia parte komprometidu atu servisu hamutuk ho parte hotu atu dezenvolve komponente aéreu tuir orientasaun Komandu F-FDTL nian.

“Ha’u promete sei halo tuir orientasaun Komandu nian hodibele dezenvolve komponente aéreu ba oin ho di’ak liu,” dehan Nia.

Daudaun ne’e, Komponente Navál iha rekursu umanu nain-15, maibé sei buka hodi aumenta membru sira too nain-37 atu bele tuir meta Komponente Aéreu nian. Enkuantu baze provizóriu Komponente Aéreu iha Aeroportu Internasionál Nicolau Lobato-Comoro-Dili.

Notísia relevante:  Falur rekomenda Governu kria akordu ho EUA apoia Komponente Aéreu

Jornalista: Natalino Costa

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here