Xefe Klinika São Joaquim Maubisse, Angelica dos Reis. Imajen/Espesiál.

DILI, 12 abril 2022 (TATOLI)—Xefe Klinika São Joaquim Maubisse, Angelica da Silva dos Reis, informa durante ne’e Klinika São Joaquim Maubisse menus medikamentu tanba medikamentu ne’e apoiu hosi Servisu Autónomu Medikamentu no Ekipamentu Saúde (SAMES) iha munisípiu Ainaro.

“Difikuldade ne’ebé ami hasoru mak menus ai-moruk, tanba ai-moruk ne’e ita simu hosi SAMES Ainaro,” Angelica dos Reis hateten ba Agência Tatoli, via telefónika, tersa ne’e.

Ai-moruk menus, nia dehan, tanba populasaun iha Maubisse barak no programa ne’ebé Klinika São Joaquim Maubisse atende ne’e la’os iha de’it Klínika São Joaquim Maubisse maibé atende mós iha postu saúde sira inklui halo mós programa SISKA.

“Siska ne’e, ita haree susar uitoan hosi ai-moruk de’it. Tanba, dala ruma to’o postu sira mak ai-moruk laiha, entaun kuitadu ba pasiente sira. Tanba, ema moras mai ne’e sira presiza fó konsulta no hetan mós ai-moruk, se ai-moruk laiha pasiénsia. Tanba ne’e, ha’u rasik dehan ba pesoál saúde sira iha postu, hanesan médiku no enfermeiru sira katak ai-moruk laiha ita bele halo buat ruma, hanesan fó promosaun ba pasiente sira. Ne’ebé, ba labarik sira ami halo hanesan ne’e, nune’e mós ba ai-moruk Paracetamól ida, ita bele fahe ba labarik na’in-rua. Ida-ne’e ita bele halo,” nia dehan.

Ho promosaun ne’ebé fó ne’e bele fahe ona informasaun ba sira, nune’e ai-moruk ida bele fó ba ema na’in-rua tanba timor-oan sira-nia fiar dehan Maromak sei fó bensa ba buat ne’ebé iha.

Nia informa, Klinika São Joaquim Maubisse enfrenta menus ai-moruk ne’e hahú kedas iha fulan-marsu tinan 2022.

“Tanba, ai-moruk ne’e ita husu la’ós kada fulan tolu, maibé ita presiza liu ne’e kada fulan ita husu maibé husu mak dehan laiha ne’e ita atu halo saida. Tanba, ai-moruk ne’e laiha la termina fulan, maibé termina nesesidade pasiente nian,” nia dehan.

Ho preokupasaun ne’e, parte klinika haruka ona proposta ba Ospitál Sentrál Ainaro maibé sira mós sei husu fali ba sentrál atu haruka ai-moruk bá, tanba Ospitál Sentrál Ainaro la’ós atende ema uitoan de’it maibé ho tempu balun mós moras gripe ne’e barak.

Jornalista : Nelia Fernandes

Editór       : Cancio Ximenes  

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here