iklan

NASIONÁL, HEADLINE

Kapitaun Higinio troka João Silva lidera komponente Navál

Kapitaun Higinio troka João Silva lidera komponente Navál

Estadu Maiór Jenerál FALINTIL-FDTL, Tenente Jenerál Falur Rate Laek entrega bandeira Komandu Komponente Navál F-FDTL ba Kapitaun Kapitaun Mar e Guerra Higinio das Neves. Imajen/Natalino Costa.

DILI, 12 abríl 2022 (TATOLI)— Komandu FALINTIL-Forsa Defeza Timor-Leste (F-FDTL), tersa ne’e, fó pose ba Kapitaun Mar e Guerra Higinio das Neves atu troka Fragata João Silva, hodi lidera Komandu Komponente Navál.

Serimónia pose ne’e hala’o, ohin, liuhosi parede militár ne’ebé partisipa direita husi Xefe Estadu Maiór Jenerál F-FDTL, Tenente Jenerál Falur Rate La’ek, Komandante Komponente sira seluk no kovidadu sira iha Komponente Navál Hera-Dili.

Biban ne’e, Tenente Jenerál Falur Rate Laek, hateten, nomeasaun ba Komandante Komponente Navál ne’e bazeia ba Estatutu Militár foun tanba forsa Navál ne’e importante tebes oinsá asegura rikusoin iha Tasi Timór.

“Tanba ne’e, Ita husu  ba Estadu presiza investe iha área komponente Navál hodi nune’e bele asegura ita nian tasi ho di’ak,” Tenente Jenerál Falur Rate La’ek, hateten liuhosi intervensaun iha seremonia pose ne’e.

Iha lei sistema autoridade maritíma ejize Komandante Komponente Navál foun atu ezerse funsaun ida Komanda Komponente Navál no funsaun seluk mak Komanda Autoridade Marítima.

“Ha’u  husu Komandante Navál,  maske servisu ba oin todan atu oinsá kontrola tasi, maibé husu parte servisu hamutuk atu fó susesu ba servisu sira ne’e, ” nia afirma.

Iha fatin hanesan, Komandante Komponente Navál, Kapitaun Mar e Guerra Higinio das Neves, hateten agradese ba Komandu F-FDTL ne’ebé fó fiar dala-ida tan hodi lidera Komponente Navál, nune’e promete sei kontinua serbisu sira ne’ebé mak komandante sesante halo ona hodi dezenvolve Komponente Navál sai forsa ne’ebé profisionál iha futuru.

“Komponente Navál la’ós buat foun ida ba ha’u tanba ha’u ema ne’ebé antigu no ema ne’ebé mós lidera komponente Navál durante  tinan 10 nia laran. Tanba ne’e promete sei dezeNvolve di’ak liután komponente Navál,” nia akresenta.

Nia dehan mandatu ne’ebé Komandu F-FDTL atribui sente todan, maibé ho parte hotu nia apoia nia sente servisu  kamaan.

“Sistema Autoridade marítima  nian, ejize ita atu asegura ita nia tasi ne’ebé luan liu rai. Tanba ha’u husu parte hotu apoia hodi ita fó susesu ba ida ne’e,” nia akresenta.

Komandante Komponente Naval ne’e husu ba membru sira atu tane aas nafatin disipliña no komitmentu hodi hamutuk serbí no dezenvolve instituisaun F-FDTL sai profisionál tuir padraun internasionál.

Daudaun,  Komponente Navál nia ekipamentu  servisu hanesan ró militár nian balun sei halo hela manutensaun.

Governu Austrália liu husi Ministériu Defeza Austrália deklara fó ona apoiu ró militár rua ne’ebé sei konstrui hela iha Austrália atu entrega ba Governu Timor-Leste iha tinan 2023.

Komandu F-FDTL kontinua koopera ho nasaun viziñu Austrália, Nova Zelándia, Portugál no nasaun seluk hodi ajuda Komponente Navál atu hala’o servisu kontrola seguransa iha fronteira tasi Timor-Leste.

Notísia relevante:  F-FDTL introdús funsionamentu serbisu Sistema Autoridade Marítima

Jornalista: Natalino Costa

Editór     : Florencio Miranda Ximenes

iklan
iklan

Leave a Reply

iklan
error: Content is protected !!