Membru Governu balun hasai imajen hamutuk ho parseiru hafoin partisipa diálogu inkluzivu ba planu dezenvolvimentu nasionál, iha auditorium Ministériu Finansa, Aitarak-laran, tersa (12/04). Imajen TATOLI/Egas Cristóvão

DILI, 12 abril 2022 (TATOLI)—Governu hamutuk ho parseiru sira halo diálogu inkluzivu, tersa ne’e, atu haree ba kooperasaun serbisu ne’ebé durante ne’e halo no planu dezenvolvimentu nasionál tinan 2023.

Ministru Koordenadór Asuntu Ekonómiku, Joaquim Amaral. Imajen TATOLI/Egas Cristóvão

Ministériu Koordenadór Asuntu Ekonómiku (MKAE), Joaquim Amaral, hateten, inisitiva ne’e hosi Gabinete Primeiru-Ministru hamutuk ho MKAE atu hametin kooperasaun ho parseiru.

“Atividade ne’e atu hamutuk ho setór privadu, sosiedade sivil no parseiru dezenvolvimetu sira atu haree progesu ne’ebé ita atinje no dezafiu,” Ministru dehan iha auditorium Ministériu Finansa, Aitarak-laran.

Notísia relevante: MKAE- parseiru aprezenta rezultadu avaliasaun rekursu turístiku iha TL  

Tanba progresu ne’ebé Governu atinje la la’o mesak, maibé ho envolvimentu entidade oin-oin ne’ebé sempre fó apoiu finanseiru, materiál no seluk tan.

“Tanba ne’e ita presiza realiza fórum sira hanesan ne’e atu hametin koopersaun no konfiansa, haree hosi aspetu saida mak ita liu ona no dezafiu saida mak sei hela, ita hamutuk buka solusaun,” nia akresenta.

Ámbitu diálogu inkluzivu ba planu dezenvolvimentu nasionál, iha auditorium Ministériu Finansa, Aitarak-laran, tersa (12/04). Imajen TATOLI/Egas Cristóvão

Iha fatin hanesan, Vise-Prezidente Kámara Komérsiu no Indústria (CCI-TL, sigla portugés), Asuntu Infrastrutura, João Alves, hateten, setór privadu sai hanesan pilár importante ba dezenvolvimentu tanba entidade ne’e kontribui maka’as iha taxa.

“Iha nasaun ne’ebé de’it bainhira laiha setór privadu maka ekonomia la sa’e, tanba hanesan pilár importante ne’ebé kria kondisaun ba empregu, indústria família ka saida de’it, no iha kapasidade atu kontribui ekonomia nasaun,” nia salienta.

CCI-TL hanesan mahon ba empreza hotu, ho papél hamutuk ho Governu no parseiru dezenvolvimentu atu kontribui ideia no eleva ekonomia nasionál.

“Entaun ami buka meiu halo rekupersaun ekonomia di’ak, maski períodu rekuperasaun han tinan tolu to’o lima, maibé tenke hahú tanba rekuperasaun ekonomia  importante atu fó garantia katak inflasaun ne’e ita bele ultrapasa ho planu di’ak,” nia tenik.

Entidade ne’ebé partisipa iha ámbitu ne’e hanesan MKAE, Ministériu Turizmu Komérsiu no Indústria (MTKI), Ministériu Obra Públika (MOP), Ministériu Justisa (MJ), CCI-TL, Fórum Organizasaun Naun Govenamentál Timor-Leste (FONGTIL) no inklui Reprezentante Embaixada sira hosi nasaun oioin iha Timor-Leste.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here