Atividade iha Portu Dili. Imajen Tatoli/Egas Cristóvão

DILI, 12 abril 2022 (TATOLI)–Ministériu Transporte no Komunikasaun (MTK) liuhosi Diresaun Nasionál Transporte Terrestre (DNTT) rejista iha trimestre dahuluk ne’e, empreza ka pesoál sira konsege importa veíkulu foun hamutuk 4.522.

“Veíkulu ne’ebé tama kompostu hosi motór 3.139 no karreta 1.383 hosi nasaun Indonézia no Austrália. Hosi transporte sira ne’e, ami rekolla taxa $900.000 resin,” Diretór DNTT, António da Costa, informa ba Agência TATOLI iha ninia knaar fatin, Balide, tersa ne’e.

Aleinde ne’e, DNTT rejista importasaun veíkulu iha dékada rua ikus hamutuk 232.012, kompostu hosi motór 179.543 no karreta 52.469, ne’ebé iha tinan kotuk DNTT konsege rekolla reseita hamutuk millaun $2,6.

Antes ne’e, Autoridade Aduaneira (AA)/Alfándega husu Governu liuhosi MTK halo revizaun ba ba lei númeru 30/2011 kona-ba kondisaun no prosedimentu ba importasaun veíkulu.

“Lei ne’e tenke halo revizaun tanba la adekuadu ho situasaun atuál, tanba ko’alia kona-ba transporte, MTK tenke inisia hafoin partilla ba parte Alfándega no komérsiu atubele fó pareser ruma,” Komisáriu Alfándega, José António Fátima Abílio, dehan.

Notísia relevante: Alfándega sujere MTK halo revizaun dekretu-lei importasaun veíkulu

La apropriadu katak veíkulu ne’ebé ninia tinan produsaun liu ona tinan-lima labele importa ona mai Timor-Leste, maibé realidade implementasaun la akontese.

Ministériu Transporte no Komunikasaun, José Agustinho da Silva, konkorda ho hanoin Alfándega ba revizasaun lejizlasaun importasaun veíkulu.

“Karik la relevante ona ho situasaun atuál bele revee lei ne’e ho intensaun hasa’e ita-nia reseita ba kofre Estadu,” nia hateten.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here