Estrada Embaixada Japaun nia oin. Imajen/Espesiál.

DILI, 12 abríl 2022 (TATOLI)—Xefe Bankada Partidu Congresso Nacional Reconstrução Timorense (CNRT) iha Parlamentu Nasionál, Duarte Nunes, kestiona prosesu rekuperasaun infraestrutura ne’ebé hetan estragu impaktu hosi dezastre naturál iha 04 abríl 2021 liubá ne’e.

Notísia Relevante: Abel Pires sei tau atensaun rekupera estragu infraestrutura hosi dezastre naturál

“Hanesan ita hatene Governu tau ona orsamentu millaun $100 hodi responde dazastre naturál maibé infraestrutura balun to’o agora kontinua ladauk hadi’a,” Nia hateten ba jornalista sira iha sala bankada, Parlamentu Nasionál, tersa ne’e.

Bankada opozisaun CNRT konsidera mezmu orsamentu Parlamentu Nasionál aprova ona atu responde dezastre naturál maibé nia implementasaun hosi parte Governu mak ladún iha kapasidade jestaun.

Aleinde ne’e, Xefe Bankada CNRT ne’e preokupa ba vítima liu-liu família balun ne’ebé afeta dezastre 04 abríl liubá ne’e, ne’ebé to’o agora kontinua hela nafatin iha lona okos.

“Ita-nia maluk balun agora kontinua hela iha lona okos hanesan iha parte Hera. Realidade hasoru nune’e  espera orsamentu ne’ebé tau ona tenta halo nune’e iha tempu tuir mai bainhira mosu dezastre naturál, povu bele hetan fatin dignu,” nia hateten.

Nune’e mós, Deputadu CNRT, Arão Noé, hateten iha orsamentu 2021 tau ona millaun $100-resin hodi hatán ba dezastre naturál ne’ebé akontese iha 04 abríl ne’ebé nia impaktu boot iha territóriu liu-liu iha Dili.

Traballadór hosi empreza Montana Diak kontinua serbisu faze finál rekonstrusaun estrada protokolu iha Embaixada Japaun oin, iha Praia dos Coqueiros, segunda (17/05). Imajen Tatoli/Florêncio Miranda Ximenes

“Iha orsamentu ratifikativu 2021 atu tau osan atende situasaun dezastre naturál no momentu ne’ebá planu saida mak atende ba ema sira sofre inundasaun Governu ko’alia atu halo uma 4.000 iha Metinaro hodi nune’e re-aloka populasaun afetadu maibé haree realidade depois tinan ida liu tiha haree to’o agora laiha inisiativa atu harii duni ka lae,” nia dehan.

Nia observa katak, infraestrutura hanesan estrada balun ne’ebé hetan estragu iha 04 abríl ne’e, to’o ohin loron barak mak ladauk hadi’a.

“Iha área mota ulun Comoro ne’e bee-mote mak sobu, estrada uluk ita ba jalur rua agora hela ida de’it ona. Nune’e hanoin problema emerjénsia rezolvidu,” nia hateten.

Antes ne’e, hafoin simu pose, Ministru Obras Públika (MOP), Abel Pires, hateten sei tau prioridade hodi servisu hamutuk ho entidade relevante iha área infraestrutura nian hodi rekupera lalais prosesu infraestrutura ne’ebé hetan estragu hosi impaktu dezastre naturál.

Enkuantu, Ministériu Obra Públika (MOP) identifika estragu sira durante dezastre naturál iha loron 04 abríl 2021 hamutuk 117 iha teritóriu laran tomak ne’ebé kompostu hosi estragu simples 40 no estragu komplexu 77 ho estimasaun kustu kuaze millaun $245.

Servisu emerjénsia ne’ebé tama nível kompleta ona ka atinje 100%, toma konta hosi empreza 37 ne’ebé projetu ualu (8) deside halo serbisu normalizasaun voluntariamente, enkuantu seluk ho pagamentu no daudaun ne’e finaliza ona.

Servisu emerjénsia nível rua (2) hamutuk ualu (8) ne’e balun kompleta ona no balun hein progresu no seluk iha faze preparasaun.

Estrada Kampung Alor kompleta 100%, ne’ebé projetu haat ninia prosesu iha Ajénsia Dezenvolvimentu Nasionál (ADN), ida Ponte Becusse iha prosesu preparasaun, ida Cantilever Ponte CPLP tama ona konkursu no ida Ponte Loes tama iha Unidade Jestaun Projetu (PMU, sigla inglés).

Servisu emerjénsia nível tolu hamutuk 17 iha faze investigasaun no preparasaun dezeñu, projetu rua haruka ona ba ADN, ne’ebé projetu 15 mak verifika ona no submete ba Konsellu Administrasaun Fundu Infraestrutura (KAFI), no servisu emerjénsia nível haat sei iha faze planeamentu.

Iha Orsamentu Jerál Estadu (OJE) 2022, Governu mós prevee ona orsamentu iha fundu infraestrutura hamutuk millaun $332 ba projetu kuaze 700-resin.

Notísia Relevante: PM orienta KAFI aselera rekupera estragu infraestrutura impaktu hosi dezastre naturál

MOP identifika estragu 117 impaktu hosi dezastre naturál

Jornalista: Nelson de Sousa

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here