Diretór Jeral Dezenvolvimentu Rurál, Rosito Guterres, ofisiálmente entrega materiál informátika ba xefe Suku Fatululik, Leonel Asa. Imajen Tatoli/Celestina Teles.

COVALIMA, 11 abril 2022 (TATOLI)–Governu liuhosi Ministériu Administrasaun Estatál (MAE) liuhosi Diretór Jerál Dezenvolvimentu Rurál, Rosito Guterres, segunda ne’e distribui materiál informátika hanesan komputadór no seluk tán ba xefe suku 30 iha munisípiu Covalima.

Xefe suku Maudemo, Maria Fátima, hateten bainhira simu materiál informátika hosi Governu sentrál ne’e hodi fasilita sira-nia servisu iha sede suku hodi halo atendimentu ba komunidade maibé Governu tenke fasilita sira hodi fó formasaun ba xefe suku sira kona-ba operasaun ba komputadór tanba xefe suku sira seidauk hatene halo servisu utiliza komputadór.

“Ami kontente bainhira Governu distribui materiál informátika mai ami maibé presiza fó formasaun ba ami, tanba ami seidauk hatene atu utiliza no halo operasaun ba komoputadór ne’e,” Maria Fátima hateten ba jornalista sira hafoin simu materiál informátika ba xefe suku na’in-30 iha salaun administrasaun Covalima, Kampung Baru, segunda ne’e.

Tuir nia, presiza halo formasaun kona-ba komputadór ba xefe suku sira hotu tanba iha xefe suku barak durante hala’o knar ne’e seidauk bele uza kpmutadór hodi atende komunidade iha área rurál.

Diretór Jerál Dezenvolvimentu Rurál, Rosito Guterres, hateten Governu liuhosi Ministériu Administrasaun Estatál distribui materiál formátika ba xefe suku 30 iha munisípiu Covalima ne’e, atu fasilita xefe suku sira bele atende komunidade ho efisiénsia liután.

“Ohin, ami entrega materiál informátika ho pakote komputadór ida no printer ida ne’ebé instaladu Sistema, ne’ebé atu atende ita-nia komundidade iha prosesu adminsitrasaun. Tanba durante ne’e ita haree inan-faluk sira mai hosi foho hodi trata deklarasaun suku, ho nune’e espera ho ekipamentu refere bele atende ho efisiénsia liután,” Diretór Jerál Dezenvolvimentu Rurál ne’e hateten.

Tuir nia, Governu distribui materiál informátika refere atu fasilita xefe suku sira hodi hala’o sira-nia knar iha sede suku hodi hala’o atendementu ba komunidade iha suku bazea ba preokupasaun ne’ebé maihosi xefe suku sira.

“Ami halo distribuisaun materiál informátika ba ita-boot sira bazea ba preokupasaun hosi xefe suku sira-ne’ebé mak durante hato’o liuhosi vizita eis Rrezidente Repúblika Taur Matan Ruak. Nune’e, ami simu orientasaun hosi Primeiru-Ministru Taur Matan Ruak hodi distribui materiál eletróniku ba ita-boot sira,” nia dehan.

Materiál informátika ne’ebé distribui ba xefe suku na’in-30 iha munisípiu Covalima ne’e mak hanesan komputadór ida ho marka Dell no printer ho marka HP no UPS ba suku 30.

Hafoin distribui materiál informátika ne’e, Governu mós sei fasilita formasaun ba xefe suku sira kada postu administratuvu, nune’e xefe suku sira bele iha kuñesementu kona-ba utilizasaun materiál infornátika refere.

Aleinde materiál informátika, xefe suku sira mós hato’o preokupasaun atu halo reabilitasaun ba sede suku sira iha territóriu Timor-Leste hamutuk 445, tanba hosi númeru ne’e falta de’it sede suku 52 mak seidauk halo reabilitasaun.

“Ha’u fiar suku 30 iha Covalima laran, balun halo ona reabilitasaun tanba sede suku iha Timor hahú konstrui iha 2006-2007 nia kondisaun la di’ak ona, entaun tempu ona atu hadi’a sede suku hirak ne’e.” nia hateten.

Iha serimónia distribuisaun materiál infomátika ne’e partisipa hosi administradór postu administrative sira, diretór munisípiu sira no xefe suku 30 iha munisípiu Covalima.

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here