STAE no CNE realiza enkontru preparasaun ho entidade relevante sira iha munisípiu Bobonaro hodi hasoru eleisaun prezidensiál volta daruak. Imajen Tatoli/Sérgio da Crus.

BOBONARO, 11 abril 2022 (TATOLI) – Sekretariadu Tékniku Administrasaun Eleitorál (STAE) no Komisaun Nasionál Eleisaun (CNE, sigla portugés),segunda ne’e realiza enkontru ida ho entidade relevante iha munisípiu Bobonaro hodi diskute preparasaun eleisaun prezidensiál volta daruak períodu 2022-2027.

Entidade relevante ne’ebé partisipa iha enkontru ne’e mai hosi autoridade, militár kompostu hosi komando PNTL, F-FDTL postu Tunubibi no autoridade sívil sira, observadór nasionál no internasionál no fiskál sira.

Diretór STAE Bobonaro, Mariano Viagas Amaral informa, erru ne’ebé identifika iha eleisaun dahuluk mak hanesan mobilizasaun transporte ba sentru votasaun no apoia hosi autoridade postu sira ladún másimu no fallansu tékiku sira ne’ebé mak akontese iha sentru votasaun sira.

“Ohin, ami realiza enkontru ne’e atu rona ideia hosi entidade hotu-hotu kona-bá eleisaun primeiru ronde liubá, atubele hadi’ak erru ne’ebé mak órgaun eleitorál hala’o ne’e nune’e bele hatudu reazultadu di’ak iha eleisaun tuir mai,” nia informa ba jornalista sira, iha administasaun munisípiu Bobonaro.

Sentru votasaun iha munisípiu  Bobonaro la asesu eletrsidade hamutuk 41 no la asesu estrada hamutuk 43 no sentru votasaun ne’ebé la besik fasilidade estadu nian harii de’it tenda hamutuk ualu, kompostu hodi postu administrativu Atabae ida, iha Balibo rua, iha Maliana sentru votasaun ida, postu Bobonaro rua no postu Lolotoé mós rua.

Diretór CNE Munisípiu Bobonaro, Juvito Ramos, hateten ekipa supervizaun sira kontinua preparadu atu kOopera ho brigade sira hosi STAE no parte hotu-hotu ba prosesu tomak hahú hosi eleisaun to’o faze apuramentu nível munisipál.

“Esfosu ne’e ami halo mak foin lalais ita hare iha eleisaun premeiru ronde, brigade sira prienxe akta barak mak sala, entaun ami koordena ho STAE halo avaliasaun hodi avalia  fila-fali problema kona-bá aktu eleitorál sira-ne’e,” nia katak.

Sekertáriu Autoridade Munisípiu Bobonaro, João Barreto Fátima do Carmo, kontinua apoia órgaun eleitóral sira intermu tékniku no prepara kondisaun sira hanesan transporte, estrada no mapamentu no apoia seluk tán nune’e bele garante susesu ba eleisaun volta daruak ne’e.

“Ami hanesan autroidade nia papél mak orienta administrador postu sira atu kanaliza  informasaun sira ba to’o iha lideransa komunitáriu sira iha baze, atu ita-nia komunidade sira-ne’ebé idade atinje ona 17 ba leten atu partisipa másimu iha eleisaun hodi bele hili ita-nia xefe estadu foun ba mandatu tinan limam,” nia dehan.

STAE Munisípiu Bobonaro rejista totál eleitor idade ne’ebé sei partisipa iha eleisaun prezidensial volta daruak  hamutuk na’in-70,283 no totál sentru votasaun ne’ebé estabelese iha postu administrativu neen hamutuk 130 no estasaun votu hamutuk 150.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here