Embaixadór Austrália iha Timor-Leste, William Costtelo, vizita Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’, iha palásiu Governu, segunda (11/04). Imajen Tatoli/Nelia Fernasdes.

DILI, 11 abril 2022 (TATOLI)—Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’, segunda ne’e simu vízita kortezia hosi Governu Austrália liuhosi Embaixadór iha Timor-Leste, William Costtelo, hodi hametin kooperasaun no diskute kona-ba servisu iha área komunikasaun nian.

“Ha’u dehan kooperasaun sira-ne’e kontinua, liu-liu liga ba servisu iha área komunikasaun nian. Embaixadór vízita kortezia ida mai iha ne’e no ami na’in-rua troka ideia kona-bá servisu ho mídia. Aleinde ne’e ko’alia mós programasaun balun mak ami hala’o ligasaun ho jornalista, oinsa ita reforsa di’ak liután ita-nia kooperasaun entre nasaun rua,” Merício Juvinal dos Reis ‘Akara’ hateten ba jornalista sira, hafoin hasoru malu ho Embaixadór Austrália, William Costtelo, iha Palásiu Governu, Dili, segunda ne’e.

Governante ne’e informa no atualiza ba Embaixadór foun William Costtelo katak kooperasaun entre Embaixada Austrália iha Timor ho SEKOMS ne’e la’o kle’ur ona no servisu la’o di’ak tebese durante ne’e, hosi Embaixadór sesante, Petter Robert, bainhira sei hala’o nia mandatu iha Timor-Leste.

Vizita ida-ne’e atu hametin no hakle’an liután kooperasaun entre Timor-Leste no Austrália hodi troka informasaun no nia atualiza ba SEKOMS kona-ba projetu fibra optik ne’ebé mak Governu Timor halo koordenasaun ho Governu Austrália.

“Ha’u hanoin ita-boot sira akompaña, ita-nia Primeiru-Ministru Taur Matan Ruak dehan beibeik ona prioridade ida mak projetu fibra optik, atu nune’e ita-nia sidadaun sira bele utiliza mídia ho internet lalais, fásil no baratu. Ida-ne’e mak ita-nia interrese,” nia dehan.

Aleinde ko’alia kona-ba servisu mídia, nia informa, atualiza mós informasaun kona-ba SEKOMS fó apoia mídia Estadu, rádiu komunidade, inklui oinsá jere Hoax (lia falsu) atu nune’e sidadaun sira iha matenek hodi utiliza plataforma mídia ho di’ak.

Nia dehan, Embaixadór ne’e informa kona-ba kooperasaun entre Rádiu Televizaun Timor-Leste, Empreza Públika (RTTL, E.P) ho mídia Austrália nian ho naran Australian Broadcasting Corporation (ABC) ne’ebé daudaun ne’e prosesu téknika la’o hela.

“Ha’u hanoin kooperasaun entre mídia rua ne’e di’ak. Aliende ne’e, ABC nu’udar mídia profisionál no kle’ur, entaun ita tenke koopera ho sira atu hasa’e ita-nia kualidade,” governante ne’e hateten.

Embaixadór Austrália iha Timor-Leste, William Costtelo, hateten Governu Austrália nia knar iha ne’e atu atualiza koneksaun internet ho di’ak, entaun agora Governu Timor-Leste halo hela prosesu atu hetan kompañia ida, nune’e bele dezenvolve koneksaun internet.

Jornalista : Nelia Fernandes

Editór       : Cancio Ximenes  

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here