Ministra Saúde, Odete Maria Freitas Belo, ofisialmente inaugura izolamentu Covid-19 iha Hospital Referál Maliana. Imajen Tatoli/Sérgio da Cruz.

BOBONARO, 11 abríl 2022 (TATOLI) – Ministra Saúde, Odete Maria Freitas Belo, segunda ne’e inaugura infraestrutura fasilidade apoia programa Covid-19 tolu iha Hospital Referál Maliana (HRM), munisípiu Bobonaro.

Fasilidade hirak-ne’e governu konstrui  hahú  hosi tinan 2020 mak hanesan laboratóriu Intensive Care Unite (ICU), sala izolamentu ba Pasiente Covid-19 no Pat Way ka kurridór ne’ebé liga hosi sala ICU ba sala baixa pasiente iha Hospital Referál Maliana.

Ministra Saude, Odete Maria Freitas Belo, hateten bainhira Timor-Leste afeta mós pandemia globál ne’e iha tinan 2019, governu halo esforsu kria kedas fundu Covid-19 ne’ebé diferente ho Orsamentu Jerál Estadu (OJE) hodi konstrui infraestrutura 10 kompostu hosi reabilitasaun rua no konstrusaun foun ualu inklui projetu tolu ne’e.

Antes implementa projetu hirak-ne’e, governu buka meiu ida kontrata empreza Timor-oan sira hodi aluga otél sai fatin kuarentena no izolamentu atu prepara fatin tratamentu dignu ba pasiente sira-ne’ebé mak infetadu Covid-19 atu nune’e labele alastra ba komunidade sira seluk.

“Objetivu hosi konstrusaun ne’ebé mak iha atu haree ba tratamentu Covid-19, tanba ita hotu-hotu hatene katak bainhira moras Covid-19 afeta mós ita-nia rai, governu kria kedas fundu espesíal ba moras ne’e atu prepara kondisaun infrastrutura sira-ne’e ba médiku no enfermeiru sira atu atende ita-nia komunidade sira-ne’ebé infetadu moras ne’e,” Ministra Saúde hateten iha nia intervensaun.

Maske infraestrutura hirak-ne’e konklui hafoin númeru kazu Covid-19 diminui iha territóriu nasionál, maibé nafatin apela ba komunidade munisípiu Bobonaro atu kontinua kumpre regra protokolu saúde nian.

Ministra Saude, Odete Maria Freitas Belo, asina plaka ba infraestrutura Covid-19 ne’ebé inaguradu. Imajen Tatoli/Sérgio da Cruz.

“Ita nafatin halo operasaun atu nune’e moras ne’e labele iha, konstrusaun foun ne’e mak iha ita uza fali ba pasiente sira-ne’ebé moras la’o ho Covid-19, maibé ba moras sira kontajioza ho naun- kontajioza ne’e mak rejista aas hanesan dengue, malária, lepra ne’ebé deklara elimina ona maibé moras ne’e sei kontinua iha ita-nia leet,” nia katak.

Diretór Ezekutivu Hospitál Referál Maliana, Boudaloue Fernandes Moniz, agradese ba Ministériu Saúde tanba maske enfrenta hela difikuldade oinoin maibé bele kontrui obra ne’e hodi bele responde ba nesesidade komunidade Bobonaro nian.

“Ida-ne’e hanesan previleiju boot tebes mai ami (Hospital Referál Maliana), maske projetu hirak-ne’e ninia prosesu konstrusaun la’o tempu naruk tebes tanba hahú kedas iha 2020 ho ninia durasaun tempu ne’ebé badak, maibé relasaun ho Covid-19 buat hotu-hotu la’o atrazu maibé ohin ita inagura ona atu ami bele uza ona,” nia dehan.

Diretór HRM rekomenda ba Ministériu Saúde atu aumenta espesialista enfermeiru tanba izolamentu Covid-19 iha totál kama 20 no sala ICU iha kama 10 nune’e labele kobre hotu serbisu sira iha ospitál ne’e.

Entretantu infraestrutura Covid-19 tolu ne’ebé governu konstrui laboratóriu Intensive Care Unit (ICU) hahú 11 janeiru 2022 no remata iha 11 marsu 2021 responsabliza hosi empreza lokál K-6 unipesoál Lda ho totál orsamentu $78,236,45.

Nune’e mós sala izolamentu totál área projetu 466,56 m2 hahú 28 dezembru 2020 responsabiliza hosi empreza Remistade Unipesoal Lda ho kustu $236,772.06 no  projetu path way ka kurridór totál área projetu 123,75 m2 hahú 16 dezembru 2021 no finaliza iha 11 abríl  2022 ho totál orsamentu $29,805.87.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here