Membru grupu Romansa Naimeco, selebra osan fundu ho funan $6,323.90 ba tinan 2021. Imajen Tatoli/ Abílio Elo Nini.

OÉ-CUSSE, 11 abríl 2022 (TATOLI) – Grupu Romansa Ne’uk-Ana, ne’ebé lokaliza iha aldeia Noke, suku Naimeco, sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA), segunda ne’e selebra ka fahe osan fundu ho funan hamutuk $6,323.90 nu’udar rezultadu rai osan durante tinan 2021 nian.

Fasilitadór ba grupu rai osan, Firmindo Caunan, hatete, fundu ne’ebé grupu Romansa Ne’uk-Ana hetan, envolve membru na’in-16 komposta hosi mane na’in-sia no feto na’in-hitu, maioria ferik no katuas, kada semana halibur osan rai iha grupu ida, nu’udar fundu empréstimu ba tinan ida nian.

“Ohin grupu Romansa Neuk-Ana selebra fahe osan fundu no funan durante tinan nian hamutuk $6,324.25, rezultadu hosi atividade romansa ne’e, membru-sira hetan benefísiu asesu ba empréstimu, asesu ona ba merkadoria, hanesan asesu ba edukasaun no nesesidade família bazea ba osan ne’ebé rai,” Firmindo Caunan, ko’alia iha suku Naimeco.

Membru grupu Romansa Naimeco, selebra osan fundu ho funan $6,323.90 ba tinan 2021. Imajen Tatoli/ Abílio Elo Nini.

Tanba osan ne’ebé rai iha sistema Romansa ne’e laiha osan kapitál, tanba osan kapitál hahú ho $1.00 dolár to’o $250.00 depende kbiit komunidade, no osan ne’e halibúr semanál, kada semana dala ida ho nia funan empréstimu  2%.

“Membru ne’ebé hakarak asesu empresta, nia funan uza 2%, ezemplu empresta $10,00 dolár nia funan sentavu $0,25, kuandu $100,00 nia funan sentavu $2,50 kada fulan, bainhira atu asesu empréstimu iha kritéria ho razaun klara mak foin hetan aprovasaun, katak osan ne’e iha objetivu atu halo saida,” nia afirma.

Tuir Firmindo, atividade realiza iha Oé-Cusse iha 2019 hahú ho grupu ida de’it ho membru na’in-12, maibé iha mudansa to’o ohin iha ona grupu 16 envolve membru 492, feto 292 mane 200 hala’o iha sub-rejiaun Pante Makasar, iha suku Naimeco no Nipani, iha sub-rejiaun Oésilo hala’o iha suku Bobometo.

“Pante Makasar ita hala’o iha Naimeco ba aldeia haat, aldeia Noke, Bonemese, Bakui no Euna’e hamutuk grupu sia (9), iha Nipani iha aldeia Sakato, no Oésilo hala’o iha suku Bobometo, rezultadu hosi grupu 16 ne’e, sira-nia osan rai iha grupu agora daudaun hamutuk $175,625.50,” nia fó-sai.

Durante realiza sistema Romansa ba grupu 16 iha Oé-Cusse iha influénsia maka’as, komunidade hotu iha suku seluk no sub-rejiaun sira iha interese atu promove, maibé difikuldade barak, tanba laiha intensivu ruma apoia nia, tanba la’o ho voluntária.

“Ha’u simu telefone husu xefe suku no xefe bairru sira atu hala’o hanesan iha Oésilo no Nítibe, maibé ha’u laiha apoia tantu hosi Guvernu no Ajénsia balu, tanba durante ne’e ha’u la’o ho voluntária tuir kbiit ne’ebé iha, iha ema barak interese atu harii sistema ne’e iha bairru no suku maibé ha’u laiha forsa atu halo akompañamentu ba sira,” nia katak.

Xefe suku Naimeco, Marcos Liu Abi, agradese ba komunidade tanba iha aldeia Noke maioria moris ho produtu lokál, no fa’an iha merkadu buka osan hodi rai iha sira grupu Romansa atu hetan funan uza ba nesesidade moris nian.

“Ha’u orgullu tanba liuhosi meiu ne’e hanorin agrikultór-sira oinsá buka moris ba ekonomia, oinsá kuda produtu atu fa’an iha merkadu, tanba iha ha’u-nia aldeia ne’e iha produtu lokál hanesan ai-farina, hudi, bua malus, ai-nanas, liis no modo, inklui goiava, liuhosi ne’e fa’an hetan osan hodi rai osan ne’e,” nia orgullu.

Xefe Grupu Romansa, Suku Naimeco, Yakobus Binu, hatete, sistema romansa hahú iha suku Naimeco iha 2019 ho grupu ida envolve membru na’in-12, ho totál osan fundu no nia funan durante tinan ida hamutuk $1.400,00 no konsege fahe hotu, iha 2020, aumenta membru sa’e ba na’in-42, ho totál osan rai durante tinan ida hamutuk $8,645.00 rezultadu fahe hotu ba membru sira.

Nune’e mós kontinua iha 2021 aumenta membru sa’e ba na’in-81 no osan ne’eb’e fahe ba tinan ida hamutuk $8.500,50, no iha tinan ne’e, iha mudansa bo’ot tanba iha ona grupu sia (9) envolve membru 284, agora osan foin hala’o fulan haat, hahú janeiru to’o abríl ne’e hamutuk $44, 397.00.

“Ami kontente tanba rai osan asesu empréstimu ho funan ki’ik 2%, no rezultadu hosi osan ne’e ami uza halo atividade uma laran, balu agora hola ona motorizada no karreta, no balu konsege halo uma luxu no fó eskola oan iha universidade, ida-ne’e ami sente kontente tanba iha mudansa iha ami-nia suku laran,” nia orgullu.

Membru Grupu, Isabel Neno, sente kontente tanba atividade ne’e hanesan dezenvolzimentu povu kbi’it laek oinsá rai osan atu responde situasaun emerjénsia no sustenta uma laran, no iha vontade atu buka osan.

“Ami kontente, tanba ita kompara ho antes seidauk tama grupu, balu ita ba deve iha banku ho funan boot, to’o balu selu labele banku mai foti uma rai no patrimóniu ne’ebé iha, maibé prezensa Romansa halo ami badinas buka osan, tanba ita rai osan hahú ho $1.00 dolár de’it, entaun ami kontente tanba fa’an bua malus ho produtu seluk ita bele hetan rai daudaun,” nia orgullu.

Tuir dokumentu ne’ebé asesu totál osan iha grupu Ne’ok-Ana hamutuk $6,324.25, komposta hosi totál osan rai iha grupu hamutuk $5,987.50, ho totál osan funan hamutuk $336,75.

Nune’e totál osan ne’ebé fahe ba membru na’in-16 hamutuk $6,323.90, no totál osan ne’ebé la fahe hamutuk sentavu $0,35.

Jornalista   : Abílio Elo Nini

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here