Ministru Defeza, Filomeno da Paixão de Jesus, Ministru Trasporte no Komunikasaun, José Agostinho da Silva no Enkaregadu Negósiu Embaixada EUA iha Timor-Leste, Tom Daley, halo vizita no haree kondisaun Aeroportu Comoro, segunda (11/04). Imajen TATOLI/Francisco Sony

DILI, 11 abril 2022 (TATOLI)—Ekipa konjunta kompostu hosi Ministériu Transporte Komunikasaun (MTK), Ministériu Defeza (MD) hamutuk ho Enkaregadu Emabaixada Estadu Unidu Amérika (EUA) iha Timor-Leste, segunda ne’e, hala’o vizita ba Aeroportu Internasionál Prezidente Nicolau Lobato, Comoro, ba kontinuasaun dezenvolvimentu infraestrutura aeroportu.

Ministru Trasporte no Komunikasaun, José Agostinho da Silva. Imajen TATOLI/Francisco Sony

Ministru Transporte Komunikasaun (MTK), José Agostinho da Silva, hateten, vizita ne’e nu’udar kontinuasaun atividade ne’ebé Forsa EUA hamutuk FALINTIL-Forsa Defeza Timor-Leste (F-FDTL) finaliza ona hanesan konstrusaun armazen no lutu perímetru iha projetu reabilitasaun Aeroportu Baucau.

“Ohin ita kontinua mai vizita ita-nia Aeroportu Comoro no haree situasaun reál ne’ebé Konsellu Administrasaun Aeroportu no Navegasaun Áerea Timor-Leste, Empreza Públiku (ANATL, E.P) hasoru hanesan problema eletrisidade, ekipamentu sukoru, rekursu umanu no buat barak ne’ebé ohin hato’o,” Ministru hateten iha Aeroportu Comoro.

Notísia relevante: Timor-Leste selebra akordu finansiamentu ho parseiru hodi dezenvolve Aeroportu Comoro

Nune’e, ohin vizita ne’e hamutuk ho Enkaregadu Embaixada EUA, Tom Daley, hodi haree parte ne’ebé presiza hetan apoiu.

Ministru Defeza, Filomeno da Paixão de Jesus, Ministru Trasporte no Komunikasaun, José Agostinho da Silva no Enkaregadu Negósiu Embaixada EUA iha Timor-Leste, Tom Daley, halo vizita no haree kondisaun Aeroportu Comoro, segunda (11/04). Imajen TATOLI/Francisco Sony

“Parte Governu sei haree katak daudaun ekipa liña ministeriál halo hela preparasaun ba konstrusaun Aeroportu Comoro. Bazeia ba reuniaun iha semana katuk, tékniku sira konklui ona serbisu. Ita espera bele alkansa ba prosesu konkursu iha Komisaun Nasionál Aprovizionamentu (CNA) nune’e ita bele aselera prosesu,” nia akresenta.

Orsamentu ne’ebé prepara ba konstrusaun Aeroportu Internasionál hosi parte Governu hamutuk milliaun $30 no apoiu hosi Governu Japaun milliaun $42, hosi Austrália sei iha prosesu nia laran, no hosi empréstimu Banku Dezenvolvimentu Asíatiku (ADB, sigla inglés) hamutuk milliaun $130.

Ministru Defeza, Filomeno da Paixão de Jesus. Imajen TATOLI/Francisco Sony

Iha fatin hanesan, Ministru Defeza, Filomeno da Paixão de Jesus, hateten, vizita ne’e hodi hetan ideia ba konstrusaun aeroportu.

“Ohin ha’u mai hamutuk ho Komadante Aérea F-FDTL no Enkaregad Embaixada EUA, ho objetivu hetan ideia ba aeroportu ida funsiona ne’e hanusa. Tanba daudaun Estadu Amérikanu prontu fó apoiu ba komponente aérea no tinan ida-ne’e nia rohan Timor-Leste sei hetan oferta avizaun  survilánsia ida hosi Amérika, ne’ebé antes ne’e ita-nia pilotu ho mekániku sira sei ba halo estudu iha illa Rodhe,” nia tenik.

Enkaregadu Embaixada EUA iha Timor-Leste, Tom Daley. Imajen TATOLI/Francisco Sony

Enkaregadu Embaixada EUA iha Timor-Leste, Tom Daley, hateten nia parte apresia tanba bele vizita Aeroportu Comoro hodi haree torre kontrolu, estasaun bombeiru inkluis fasilidade aeroportu nian.

“Ba difikuldade sira ne’ebé ohin ami haree, ba oin bele serbisu hamutuk ho Governu Timor-Leste atu haree saida mak ami bele halo hodi ajuda saida mak Aeroportu presiza. Ha’u kompriende katak prosesu konstrusaun ne’e daudaun la’o hela no ami labele halo buat ruma ne’ebe mak interfere ba  prosesu rekonstrusaun ne’e,” nia dehan.

Fatin sira ne’ebé ohin akipa konjunta halo vizita mak hanesan eskritóriu ANATL, fatin kontrolu aviaun, fatin pasajeiru tama sai aeroportu, fatin bombeiru no ikus mak fatin komponente aérea.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here