Estudante Eskola Katólika São José Operário, Balide. Imajen/FB

DILI, 11 abril 2022 (TATOLI)–Diretór Servisu Edukasaun Munisípiu Dili (DSED) sesante, Duarte Braganza, deside la kontinua asina diploma hosi Eskola Katólika Ensinu Sekundáriu São José Operário, Balide, tanba hetan krítika hosi inan-aman finalista balun kona-ba legalidade diploma.

“Ha’u deside la kontinua asina diploma tuir mai hosi Eskola São José Operário hamutuk 200 resin tanba ha’u hetan krítika hosi inan-aman hosi eskola ualu ne’ebé sira-nia oan nia diploma ha’u asina ona,” Diretór sesante, Duarte Braganza hateten iha ninia knaar fatin, Comoro, segunda ne’e.

Notísia relevante: DSED sesante asina ona diploma estudante hosi eskola ualu

Antes ne’e, Diretór sesante lakohi atu asina, maibé parte Ministériu Edukasaun Juventude no Deportu (MEJD) reforsa ho despaixu no haruka nia asina.

“Ha’u dehan ona, ha’u lakohi foti risku ho asuntu diploma, tanba  nu’udar funsionáriu baibain ona. Maibé tanba Ministériu garante ho despaixu ministeriál númeru 13/GM-MEJD/III/2022, entaun ha’u asina, maibé ha’u husu mós despaxu seluk hosi Komisaun Funsaun Públika (KFP) hodi reforsa ha’u-nia serbisu,” nia akresenta.

Maski nune’e, nia konsidera krítika sira hanesan lisaun ida no espera MEJD bele rezolve hodi nia bele kontinua asina, tanba agora diploma eskola ualu asina ona.

“Daudaun prepara atu asina tan diploma hosi eskola ida maka inan-aman sira preokupa ha’u-nia legalidade kona-ba diploma sira ne’ebé ha’u asina ona,” nia tenik.

Iha fatin ketak, Aman hosi finalista Eskola Ensinu Sekundáriu Jerál (ESJ) Nicolau Lobato, Comoro, Joaquim Noronha Soares, hateten, preokupa ho legalidade tanba Duarte Braganza la asume ona kargu Diretór hanesan hakerek iha diploma.

“Loloos laiha ona direitu asina dokumentu formál Estadu, kuandu nia asina valór hosi dokumentu ne’e laiha, se iha mós ema sei kestiona dokumentu. Ami-nia kompreensaun kuandu dokumentu importante ida atu hetan asinatura hodi garante legalidade, bainhira funsionáriu ida asume pasta ka knaar importante, maibé kuandu laiha ona pozisaun mak nia asina fali dokumentu formál maka hamosu preokupasaun,” nia salienta.

Nia dehan, hanesan inan-aman, nia parte la kontente tanba estudante sira durante tinan-tolu hamahan-an iha eskola formál ida atu hetan rekoñesimentu ho diploma formál.

“Maibé ikus mai Governu hamonu tiha diploma ne’ebé laiha legalidade,” Joaquim Noronha preokupa.

Eskola ualu ne’ebé asina ona diploma mak hanesan Eskola Canossa Has-laran, Externato São José, Eskola ESJ Heroi da Pátria, Eskola ESJ 20 Setembru Metinaro, Eskola São Francisco Dare, Semináriu Menór Fatumeta, Eskola ESJ São Miguel Comoro, no Eskola Paulo VI.

Antes ne’e, Prezidente KFP, Faustino Cardoso, husu ba Diretór Servisu Edukasaun Munisípiu Dili sesante, Duarte Braganza, atu kontinua asume responsabilidade asina diploma estudante finalista sira, tanba konsidera iha responsabilidade ba asaun ka aktu administrativa ne’ebé hala’o durante períodu responsabilidade ninian, maski la asume ona kargu.

Diretór Servisu Edukasaun munisípiu Dili, Duarte Braganza inklui Diretór Servisu Edukasaun munisipál haat seluk hetan ona ezonerasaun, enkuantu naran iha diploma nível Sekundáriu Jerál no Tékniku Vokasionál tinan akadémiku 2021 uza sira-nia naran.

Mandatu Duarte Braganza lolos termina iha loron loron 31 dezembru 2021, maibé tanba mosu desizaun polítika, MEJD hasai despaixu ezonerasaun iha loron 31 outubru 2021 hodi nomea fali Carlito da Silva nu’udar Diretór Servisu Edukasaun Munisípiu Dili foun.

Ba tinan akadémiku 2021, iha estudante finalista na’in-21.567 mak termina ona estudu iha nível Sekundáriu Jerál no Tékniku Vokasionál.

Iha loron 13 dezembru 2021, estudante finalista hamutuk 58.224 iha territóriu nasionál partisipa ezame nasionál, kompostu hosi estudante Ensinu Báziku 31.143, Ensinu Sekundáriu 22.223, Ensinu Sekundáriu Tékniku Vokasionál 4.858, enkuantu hosi Dili de’it iha totál estudante 16.752.

Nune’e, iha loron 20 janeiru 2022, MEJD anunsia rezultadu ezame nasionál hosi Eskola Ensinu Báziku no Ensinu Sekundáriu iha territóriu tomak, ne’ebé hatudu katak na’in-18 mak la pasa no 50.752 aprovadu, kompostu hosi estudante Ensinu Báziku 31.143 no Ensinu Sekundáriu 22.223.

Jornalista : Tomé Amado

Editora     : Julia Chatarina  

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here